მიხეილ სააკაშვილი ბიძინა ივანიშვილს მოკლავს. ეს განცხადება ჩეჩნეთის ყოფილი პრეზიდენტის ყოფილმა წარმომადგენელმა საქართველოში ხიზრი ალდამოვმა "ვესტი კავკაზა"-სთან საუბარში გააკეთა.
"ახლა ივანიშვილი რომ არის, იმასაც მოკლავს. კიდევ გეუბნებით, მე ახლა აქ რომ ვდგავარ და გელაპარაკებით, არ ვიცი, ვიცოცხლებ თუ არა და მივალ თუ არა სახლამდე. მე არ ვედრები არც დუმბაძეს, არც პატარკაციშვილს და არც ჟვანიას, მე სიკვდილი არ მინდა. რატომ უნდა მომკლან?! - იმიტომ, რომ სიმართლეს ვამბობ?! თუ ნორმალური ადამიანი ხარ, წადი, ათასობით ხალხი ითხოვს შენს წასვლას - წადი. ნუ აშინებ ხალხს ამერიკული ფულით, სხვისი ფულით აშინებ შენს ხალხს - არ შეიძლება ასე",_ აცხადებს ალდამოვი და აგრძელებს:
"ჟვანია რომ ყოფილიყო, რუსეთთან ომი არ იქნებოდა და საქართველო არ დაკარგავდა ტერიტორიების 20 %-ს. დღეს რომ შენ პროვოკაციებს აწყობ რუსეთის ტერიტორიაზე - ჩემთვის რა მნიშვნელობა აქვს, ეს ჩეჩნეთში ხდება, ინგუშეთში თუ ოსეთში. ამას ჩემთვის რა მნიშვნელობა აქვს, ყველაფერს შენ აფინანსებ, შენ გასცემ ბრძანებებს ყველაფერზე, შენ აგზავნი სპეციალურად ამ ხალხს რუსეთის მიწაზე, ახლა მეც რუსეთის მიწაზე ვიმყოფები და ახლა შენ აგზავნი აქ ჩემსავე ნათესავებს - ქისტებსა და ჩეჩნებს ჩემს მოსაკლავად. არ არის საჭირო. იქ წადი, საიდანაც მოსულხარ და ამ ხალხს თავი დაანებე. ადრე კარგად ცხოვრობდნენ რუსები და ქართველები, ცხოვრობდნენ და მომავალშიც იცხოვრებენ, შენ თუ ამის საშუალებას მისცემ, ხოლო თუ შენ მათ ამის საშუალებას არ მისცემ, ხალხი აღდგება. ივანიშვილმა უკვე თქვა, რომ ხალხი გამოვა", _ აცხადებს ალდამოვი.
შეგახსენებთ, რომ ხიზრი ალდამოვი რამდენიმე ხნის წინ ჩეჩნეთში გადავიდა, რამზან კადიროვის წინაშე მოინანია, ჩეჩენ ხალხს ბოდიში მოუხადა და თავის მიწაზე ცხოვრების უფლება მოითხოვა. მან ასევე განაცხადა, რომ უბედურება ჩეჩენ ხალხს არა რუსეთმა, არამედ ჯოჰარ დუდაევმა და მისმა თანამებრძოლებმა მოუტანეს.
