"აირზენა" ბათუმის მიმართულებით რეისებს ამატებს. როგორც სააგენტო "ჯი-ეიჩ-ენთან" საუბრისას, ავიაკომპანია "აირზენას" წარმომადგენელმა ნინო გიორგობიანმა განაცხადა, ზაფხულის ტურისტულ სეზონთან დაკავშირებით, 1-ლი აგვისტოდან "აირზენა" თბილისი-ბათუმის რეისებს ყოველდღიურად შეასრულებს. ერთი მიმართულების მგზავრობის ღირებულება 170 ლარია და თბილისი-ბათუმის რეისი, თბილისის საერთაშორისო აეროპორტიდან, 08:00 საათზე განხორციელდება, ხოლო ბათუმი-თბილისის ავიარეისი, ბათუმის საერთაშორისო აეროპორტიდან - 22:00 საათზე.
აღსანიშნავია, რომ დღემდე "აირზენა" თბილისი-ბათუმის რეისებს კვირაში 4-ჯერ ახორციელებდა, თუმცა ტურისტული სეზონისა და მგზავრთნაკადის ზრდის გამო, კომპანიამ დამატებითი რეისების დანიშვნა გადაწყვიტა.
ამასთან, "აირზენა" 2 აგვისტოს საზოგადოებას ბათუმში, პიაცაზე დაგეგმილ ვალერი მელაძის კონცერტზე დასწრების საშუალებას სთავაზობს. როგორც ნინო გიორგობიანი განმარტავს, 2 აგვისტო სამუშაო დღეა და "აირზენა" ვალერი მელაძის ფანებს კონცერტზე დასწრების საშუალებას აძლევს, ანუ სპეციალურად კონცერტისთვის კომპანიამ ჩარტერული რეისი დანიშნა, რომელიც მგზავრებს ბათუმისკენ 6:30 საათზე გადააფრენს, ხოლო კონცერტის დასრულების შემდეგ თბილისში დააბრუნებს.
