შრომის, ჯანმრთელობისა და სოციალური დაცვის მინისტრი ზურაბ ჭიაბერაშვილი წალკაში მცხოვრებ უშხვანების 7 სულიან ოჯახს ესტუმრა და ჯანმრთელობის დაზღვევის სახელმწიფო პოლისები პირადად ჩაუტანა. უშხვანების ოჯახის დიასახლისი ქალბატონი ნინა და მისი შვილიშვილი 4 წლის თორნიკე კუთვნილი პოლისებით სარგებლობას 2012 წლის 1 სექტემბრიდან შეძლებენ.
ჯანდაცვის მინისტრმა ოჯახის წევრებს პოლისით გათვალისწინებული მომსახურებებისა და სარგებლობის წესების შესახებ დეტალური ინფორმაცია მიაწოდა. ოჯახის წევრებთან საუბრისას ზურაბ ჭიაბერაშვილმა ჯანმრთელობის დაზღვევის მნიშვნელობასა და დაზღვეულთა წრის გაფართოების აუცილებლობაზეც გაამახვილა ყურადღება.
მოსახლეობისათვის ხარისხიანი სამედიცინო მომსახურების ხელმისაწვდომობის უზრუნველყოფა საქართველოს მთავრობის ერთ-ერთი მთავარი ამოცანაა. სწორედ ამიტომ სახელმწიფო რეგულარულად აფართოვებს დაზღვეულთა წრეს. ამჟამად სახელმწიფო დაზღვევით 900 ათასამდე მოქალაქე სარგებლობს, 2012 წლის 1 სექტემბრიდან სახელმწიფო დამატებით მილიონზე მეტ ადამიანს დააზღვევს. კერძოდ დაზღვეულთა რაოდენობა 500 ათას მოქალაქეს აღწევს. შესაბამისად 2012 წლის 1 სექტემბრიდან საქართველოში დაახ 2.4 მილიონი ადამიანი, ანუ ყოველი მეორე მოქალაქე დაზღვეული იქნება.
მოგვიანებით, ჯანდაცვის მინისტრმა შპს, „ჯეო ჰოსპიტალსის" კუთვნილი წალკის მრავალპროფილური სამედიცინო ცენტრი დაათვალიერა და კლინიკაში დასაქმებულ მედპერსონალს შეხვდა. ზურაბ ჭიაბერაშვილმა მედიკოსებს ჯანდაცვის სექტორში არსებული გამოწვევები და რეფორმის ძირითადი მიმართულებები გააცნო.
15 საწოლიანი კლინიკა ულტრათანამედროვე აპარატურით არის აღჭურვილი. სამედიცინო ცენტრში 61 ადამიანი, მათ შორის: 19 ექიმი და 23 ექთანია დასაქმებული. კლინიკის ასაშენებლად სადაზღვევო კომპანია „ირაომ" 4 მილიონი ლარის ინვესტიცია განახორციელა. კლინიკამ ფუნქციონირება 2011 წლის დეკემბერში დაიწყო. გახსნის შემდეგ, წალკის სამედიცინო ცენტრში 4709 პაციენტი მიიღეს.
