თურქეთის პორტში გემ "გრანდ აილენდზე" მყოფი ქართველი მეზღვაურები დახმარებას ითხოვენ. კომოროს დროშის ქვეშ მცურავი გემი, რომლის 10-კაციანი ეკიპაჟიდან 6 საქართველოს მოქალაქეა, მარტის თვიდან სტამბულთან საშიშ ტვირთთა პორტში დგას.
მეზღვაურების თქმით, მათ უკვე 5 თვეა ხელფასი არ მიუღიათ. გემზე ამოიწურა საკვებისა და წყლის მარაგიც.
გემთმფლობელი კომპანია ბერძნული ფირმა "გრის მერითაიმია", რომლის წარმომადგენელიც, ეკიპაჟის თქმით, მეზღვაურებს ბოლოს 2 თვის წინ შეხვდა და სახელფასო დავალიანების დაფარვას დაჰპირდა.
გავრცელებული ინფორმაციით, მეზღვაურების დასაქმებაში კვლავ ლაურა ჩადუნელის სააგენტო ფიგურირებს.
გემი ამ დრომდე თურქეთში რჩება. მეზღვაურები ხელფასების დარიგებას ელოდებიან და საქართველოში დაბრუნებას მხოლოდ ამის შემდეგ გეგმავენ.
