დღეს, 19 ივლისს, 15:00 საათზე ბაზალეთის სასტუმრო კომპლექსში ახალგაზრდული ორგანიზაცია "გამა პრო ბონო ჯგუფისა" და საერთაშორისო განათლების ამერიკული საბჭოების ინიციატივით, იხსნება „კავკასიის ახალგაზრდული საბჭოს" პირველი სხდომა. ღონისძიება 22 ივლისამდე გასტანს.
როგორც ”ჯი-ეიჩ-ენს” საქართველოში აშშ-ის საელჩოდან აცნობეს, „კავკასიის ახალგაზრდული საბჭოს" სხდომაში მონაწილეობს სომხეთის, აზერბაიჯანისა და საქართევლოს 40 წარმატებული ახალგაზრდა. პროექტი მიზნად ისახავს კავკასიელ ახალგაზრდებს შორის ურთიერთობების გაღრმავებას, ცოდნისა და გამოცდილების გაზიარებას და რეგიონისათვის აქტუალური პრობლემების განხილვას.
სესიაზე განხილული იქნება შემდეგი საკითხები: დემოკრატია და ადამიანის უფლებები, კონფლიქტების მშვიდობიანი მოგვარება, ეკონომიკური ზრდა, კორუფციასთან ბრძოლა და სხვა. აღნიშნულ საკითხებზე მომზადდება შესაბამისი რეკომენდაციები, რომელიც პეტიციის სახით წარედგინება სამთავრობო თუ არასამთავრობო ორგანიზაციებს.
პროექტის პირველ დღეს, „საერთაშორისო გამჭვირვალობა-საქართველოს" ექსპერტები გამართავენ სემინარებს კორუფციის, თავისუფალი მედიისა და ეფექტური საჯარო მმართველობის შესახებ.
პროექტი დაფინანსებულია აშშ-ს სახელმწიფო დეპარტამენტის მიერ და ხორციელდება აშშ-ის საელჩოსა და „საერთაშორისო გამჭვირვალობა-საქართველოს" მხრადაჭერით.
