დღეს, 13 ივლისს, 12:00 საათზე, "სამართლიანი არჩევნებისა და დემოკრატიის საერთაშორისო საზოგადოება" წინასაარჩევნო გარემოს მონიტორინგის მესამე შუალედურ ანგარიშს გამოაქვეყნებს.
როგორც "ჯი-ეიჩ-ენს" ორგანიზაციიდან აცნობეს, "სამართლიანი არჩევნები" წინასაარჩევნო გარემოს მონიტორინგს საქართველოს 73 საარჩევნო ოლქში გრძელვადიანი დამკვირვებლის მეშვეობით ახორციელებს. მესამე შუალედური ანგარიში მოიცავს პერიოდს 2012 წლის 4 ივნისიდან 2 ივლისის ჩათვლით, აგრეთვე მოვლენებს, რომელთა განვითარებაც 4 ივნისამდე დაიწყო, მაგრამ მონიტორინგის პერიოდშიც მიმდინარეობდა. მონიტორინგი მოიცავს ისეთ ფაქტებს, როგორიცაა: პოლიტიკური ნიშნით სამსახურიდან განთავისუფლების, მუქარის, ზეწოლის, ფიზიკური ანგარიშსწორების, ადმინისტრაციული რესურსის გამოყენების, ამომრჩევლის მოსყიდვის, ადმინისტრაცული პატიმრობების შეფარდების შემთხვევები და სხვა.
ანგარიშში, ასევე, ასახულია ინფორმაცია პოლიტიკური გაერთიანებების მიერ მთელი ქვეყნის მასშტაბით ორგანიზებული შეხვედრებისა და მოქალაქეთათვის მიცემული წინასაარჩევნო დაპირებების თაობაზე.
პრესკონფერენცია გაიმართება „სამართლიანი არჩევნებისა და დემოკრატიის საერთაშორისო საზოგადოების" ცენტრალურ ოფისში (ონიაშვილს ქ. N 37).