აზერბაიჯანელმა მესაზღვრეებმა დავით - გარეჯის სამონასტრო კომპლექსში მოღვაწე სასულიერო პირები ბერთუბანში არ შეუშვეს. როგორც მღვდელმონაზონმა კირიონმა კახეთის საინფორმაციო ცენტრს განუცხადა, მათ საქართველო - აზერბაიჯანის საზღვარი ლეგალურად გადაკვეთეს, თუმცა ბერთუბნის მოლოცვის საშუალება არ მიეცათ.
ბერთუბანი აზერბაიჯანის ტერიტორიაზე, საქართველოს საზღვართან ახლოს მდებარეობს.
„გუშინ ბერთუბანში წავედით მოსალოცად, დარეკილი გვქონდა აზერბაიჯანის საელჩოში და გვითხრეს, პრობლემა არ არის წითელი ხიდიდან შედით და მიბრძანდით სადაც გინდათო. ჩვეულებრივ გავიარეთ სასაზღვრო კონტროლი წითელ ხიდზე, შევედით სოფელ ფუილოში, იქაც აქვთ პატარა სამხედრო ბლოკპოსტი, გაგვაჩერეს, საბუთები შეამოწმეს და გაგვატარეს. მონასტერთან ახლოს პატარა ბლოკპოსტია, მესაზღვრეებს ვუთხარით სადაც მივდიოდით, მაგრამ რამდენიმე საათი გაგვაჩერეს. გვეუბნებოდნენ, სასაზღვრო ზონა დაარღვიეთო. ვუთხარით, საზღვარი როგორ დავარღვიეთ, საზღვარი გამოვიარეთ, მერე თქვენი ბლოკპოსტი გამოვიარეთ, შემოვედით, რა დავაშავეთ, ხომ არ შემოვპარულვართ მეთქი. დაახლოებით 5 საათი პასპორტებს აღარ გვიბრუნებდნენ, ბოლოს ვახტანგისიდან გამოგვიშვეს უკან ფეხით, რადგან იქ მანქანებით გამოსვლა არ შეიძლება. მონასტრის მოლოცვა ვერ შევძელით," - განუცხადა კახეთის საინფორმაციო ცენტრს მამა კირიონმა.
შეგახსენებთ, რომ 6 მაისიდან დავით გარეჯის ლავრის უდაბნოს მონასტერთან აზერბაიჯანელი მესაზღვრეები განლაგდნენ და მონასტრის ტერიტორიაზე მომლოცველებსა და ტურისტებს არ უშვებდნენ. 20 მაისიდან უდაბნოს მონასტრის ტერიტორიაზე დაწესებული შეზღუდვები მოიხსნა, თუმცა აზერბაიჯანელი მესაზღვრეები ტერიტორიაზე რჩებიან.
