სახალხო დამცველი გიორგი ტუღუში სპეციალურ განცხადებას ავრცელებს, სადაც ყველა მედიასაშუალებას პროფესიული სტანდარტებისა და ეთიკის ნორმების მკაცრად დაცვისკენ მოუწოდებს.
გავრცელებულ განცხადებაში აღნიშნულია, რომ ბოლო ორი კვირის განმავლობაში საინფორმაციო საშუალებების მიერ გავრცელდა არაერთი ვიდეო ჩანაწერი, რომელზეც ასახულია ნაწილ ჟურნალისტთა მიერ სამუშაო პროცესში სხვა ჟურნალისტებისადმი დაბრკოლებების შექმნა და უპატივცემულო და არაკოლეგიური დამოკიდებულების გამოვლენა. უდავოა, რომ ნებისმიერი საინფორმაციო საშუალების წარმომადგენელს და ჟურნალისტს, პროფესიული საქმიანობის განხორციელებისას, აქვს უფლება თავისუფლად და ყოველგვარი დაბრკოლების გარეშე, მოიპოვოს მისთვის საჭირო ინფორმაცია. თუმცა, აღნიშნული არ წარმოადგენს აბსოლუტურ უფლებას. ამავდროულად აუცილებელად მიმაჩნია ინფორმაციის მოპოვებისას ჟურნალისტებმა დაიცვან ეთიკის ნორმები და პროფესიული სტანდარტები. ჯეროვანი სამართლიანობისა და პატივისცემის დაცვით მოეპყრონ ყველა ფიზიკურ თუ იურიდიულ პირს. მით უფრო მიუღებელად ვთვლი სხვა საინფორმაციო სააგენტოებისა თუ მედია საშუალების წამომადგენელთათვის შეურაცხყოფის მიყენებას და მათთვის პროფესიული საქმიანობის განხორციელებისას დაბრკოლებების შექმნას, -ნათქვამია სახალხო დამცველის მიერ გავრცელებულ განცხადებაში.
გიორგი ტუღუში ყველა ყველა მედიასაშუალებას პროფესიული სტანდარტებისა და ეთიკის ნორმების მკაცრად დაცვისკენ მოუწოდებს.
მოვუწოდებ ყველა მედიასაშუალებას, მათ წარმომადგენლებსა და მსგავსი საქმიანობით დაკავებულ ყველა პირს, საქმიანობისას მკაცრად დაიცვან პროფესიული სტანდარტები და ეთიკის ნორმები, თავი შეიკავონ ისეთი ქმედებებისგან, რომელიც შეურაცხმყოფელია სხვა კოლეგებისადმი, პროვოცირებას უკეთებს კონფლიქტს და ქმნის დაპირისპირების საფრთხეს, _ აღნიშნულია განცხადებაში.
