ურეხში საცხოვრებელ სახლზე ქვების სროლა გრძელდება. ტელეკომპანია "ტვ 25"-ის ინფორმაციით, უცნაური შემთხვევა ერთი კვირის წინ დაფიქსირდა. უხილავი არსება სახლს ქვებს დღისით და ღამით უშენს. ბოლო ორი დღის განმავლობაში ქვების ცვენა შეჩერდა, თუმცა დღეს განახლდა.
სახლის მიმდებარე ტერიტორიას 24-საათიან რეჟიმში ურეხის პოლიციის თანამშრომლები, სპეციალურად გაწვრთნილ ძაღლებთან ერთად იცავენ, თუმცა კვალს ვერ მიაგნეს. უცნაური შემთხვევა პოლიციელთა თანდასწრებითაც ხდება, სამართალდამცველები პირად საუბარში ჰყვებიან, რომ ხედავენ ქვების სახლის სახურავსა და ეზოს მიმდებარე ტერიტორიაზე დავარდნას, თუმცა სროლის ტრაექტორიას ვერ ადგენენ. სახურავზე დაცემული ქვები, სხვა ქვებისგან განსხვავებით, ძირს არ ცვივა.
გავრცელებული ინფორმაციით, ქვებს ექსპერტიზა ჩაუტარდა და მათი არამიწიერი წარმომავლობა დადგინდა. ამ ფაქტს ძალოვანი უწყების წარმომადგენლები არ ადასტურებენ.
"ტვ 25"-ის ფოტო
