თბილისის საკრებულოს თავმჯდომარის მოადგილე, ქრისტიან-დემოკრატი, ჯაბა სამუშია ქეთევან წამებულის გამზირზე სოციალურად დაუცველ და მიწისძვრით დაზარალებულ მოსახლეობას შეხვდა და მათ პრობლემებს გაეცნო.
ჯაბა სამუშიას თქმით, ქეთევან წამებულის 58 ნომერში, მესამე კატეგორიის ავარიულ შენობებში ცხოვრობს რამოდენიმე ოჯახი, რომელთა მთავარი პრობლემა არის გაზიფიცირება.
მისი განცხადებით, დენისა და გაზის გადასახადის გაერთიანების საკითხი საკრებულომ მიიღო და ის ოჯახები, რომლებიც მთლიანად არიან დამოკიდებული ელექტროენერგიაზე, მათთვის მერიამ გაზის შეყვანა გადაწყვიტა. თუმცა, გაზიფიცირება ვერ მოხერხდა.
"ეს საკითხი აუცილებლად გავა საკრებულოს სხდომაზე და მისი დროულად მოგვარებისთვის შესაბამისი განცხადებით "ქრისტიან-დემოკრატები" თბილისის მერიას მიმართავენ." - განაცხადა ჯაბა სამუშიამ.
მასალის გამოყენების პირობები
