საგანგებო სიტუაციათა სამსახურის უფროსი თემურ გიორგაძე "ჯი-ეიჩ-ენთან" საუბარში უარყოფს ინფორმაციას, რომ ქიმიური ავზიდან გაჟონვა ხელახლა მოხდა. მისი თქმით, ავზს ონკანი შეუცვალეს და გაჟონვის საფრთხე აღმოფხვრილია.
მისი თქმით, ავზიდან გაჟონვა სწორედ დაზიანებულმა ონკანმა გამოიწვია და მისი შეცვლა აუცილებელი იყო.
ონკანის გამოცვლის დროს მოხდა მცირე ამოფრქვევა, რომელიც სახანძრო სამსახურის ბრიგადების მიერ წყლის ჭავლით დროულად გაიწმინდა.
შეგახსენებთ, რომ ლილოში გაერთიანებული წყალმომარაგების კომპანიის ქიმიური ავზი მწყობრიდან გამოვიდა და ქლორმა გაჟონა. დაზარალებულები არიან მიმდებარე კორპუსებში მცხოვრები ადამიანები, რომლებიც რეფერალურ საავადმყოფოსსა და ინგოროყვას კლინიკაში გადაიყვანეს. გაჟონვა მოხდა 800-ლიტრიანი ქიმიური ავზიდან, რომელსაც ონკანი მოძვრა. დაზუსტებული ინფორმაციით, დაზარალებულია 56 ადამიანი, რომელთა შორის 20 ბავშვია და 1 ორსული. 19 წლის ახალგაზრდის მდგომარეობა განსაკუთრებულად კრიტიკულია. როგორც: თბილისის მერიის სოციალური მომსახურებისა და კულტურის საქალაქო სამსახურის უფროსმა მამუკა ქაცარავამ განაცხადა, ამ დროისათვის ავადმყოფი კომატოზურ მდგობარეობაშია და პროგნოზი არასაიმედოა.
ლილოში მოსახლეობის ევაკუაციის საჭიროება არ არსებობს. დაზიანებული 800-ლიტრიანი ქიმიური ავზი უსაფრთხო ადგილზე გადააქვთ.
ქლორის გაჟონვის გამო შესაბამისმა სამსახურებმა ჰაერის მდგომარეობაზე ტესტი ჩაატარეს. ისან-სამგორის რაიონის გამგებელის თემურ გრიგალაშვილის ინფორმაციით, ტესტმა აჩვენა, რომ მიმდებარე ტერიტორიაზე ჰაერი ნორმის ფარგლებშია და პანიკის საფუძველი არ არსებობს.
დაზარალებულები ქვეყნის პრეზიდენტმა მოინახულა.
