2-4 ივლისს თბილისს, აშშ- საქართველოს ურთიერთობებზე სასაუბროდ აშშ-ის კონგრესის 6-კაციანი დელეგაცია ეწვევა. დელეგაციას კონგრესმენი ბილ შუსტერი (რესპუბლიკელი, პენსილვანიის შტატი) უხელმძღვანელებს.
როგორც "ჯი-ეიჩ-ენს" საქართველოში აშშ-ის საეჩოდან აცნობეს, კონგრესმენები შეხვდებიან პრეზიდენტ მიხეილ სააკაშვილსა და თავდაცვის მინისტრის პირველ მოადგილე ნოდარ ხარშილაძეს. დელეგაცია აგრეთვე შეხვდება ოპოზიციის ლიდერებს, დაათვალიერებს კერძო სამედიცინო კლინიკას და დაესწრება ამერიკელი და ქართველი ჯარისკაცების ერთობლივ წვრთნას, რომელსაც ისინი ავღანეთის სამშვიდობო მისიისათვის მოსამზადებლად გადიან.
კონგრესმენი შუსტერი აშშ-ის წარმომადგენელთა პალატის წევრია 2001 წლიდან. ის შეიარაღებული ძალების კომიტეტის წევრია. მის მოვალეობებში შედის აშშ-ის თავდაცვის დეპარტამენტის, აშშ-ის შეიარაღებული ძალებისა და ნაწილობრივ, აშშ-ის ენერგეტიკის დეპარტამენტის დაფინანსებისა და ფინანსების მონიტორინგის საკითხები.
დელეგაციის სხვა წევრები არიან: კონგრესმენი ჯეისონ ალტმაიერი (დემოკრატი, პენსილვანიის შტატი), ბრეტ გუტრი (რესპუბლიკელი, კენტუკის შტატი), ჯეფ დენჰემი (რესპუბლიკელი, კალიფორნიის შტატი), ბლეიკ ფერენტჰოლდი (რესპუბლიკელი, ტეხასის შტატი), და ადამ კინზინგერი (რესპუბლიკელი, ილინოისის შტატი). ჩამოთვლილი კონგრესმენები აშშ-ის კონგრესის სხვადასხვა კომიტეტებში მსახურობენ, მათ შორის, ვეტერანთა საქმეების, ენერგეტიკისა და ვაჭრობის, აგრეთვე ტრანსპორტისა და ინფრასტრუქტურის კომიტეტებში.
