იაპონიაში ვიზიტის დროს საქართველოს პრემიერ-მინისტრი ნიკოლოზ გილაური იაპონიის პრემიერ-მინისტრ იოშიკო ნოდას (Yoshihiko Noda) შეხვდა. პრემიერ-მინისტრებმა განიხილეს ქვეყნებს შორის ეკონომიკური თანამშრომლობა და საინვესტიციო პროექტები.
"საინტერესო და კარგი შეხვედრები გვქონდა იაპონიის მთავრობის წარმომადგენლებთან: პრემიერ-მინისტრთან, ეკონომიკის, ტრანსპორტის, ტურიზმის მინისტრებთან. ორი თემაა განსახილველი. რა თქმა უნდა, ერთ-ერთი არის პოლიტიკური მხარდაჭერა, მეორე არის ეკონომიკური ურთიერთობები. პოლიტიკურად, შეგვიძლია ვთქვათ, რომ იაპონია ერთ-ერთი ყველაზე მნიშვნელოვანი მხარდამჭერია ჩვენი ტერიტორიული მთლიანობის, სუვერენიტეტის. ვაჭრობის თვალსაზირისით, შეიძლება ითქვას, რომ უმნიშვნელოვანესი პარტნიორია ჩვენთვის. როდესაც ვამბობთ, რომ საქართველო ჩამოყალიბდა, როგორც რეგიონალური ცენტრი, რომ საქართველოს ერთ-ერთი მთავარი საექსპორტო პროდუქტი სწორედ ავტომობილებია, ეს არის იაპონიიდან ჩამოსული ავტომობილები, ძირითადად "ტოიოტას" მიერ ნაწარმოები ავტომობილები. შესაბამისად, იაპონურმა კომპანიებმა უკვე გამოსცადეს საქართველო, როგორც ძალიან მნიშვნელოვანი ეკონომიკური პარტნიორი, როგორც ძალიან მნიშვნელოვანი სავაჭრო პარტნიორი", - აღნიშნა გილაურმა იაპონიის პრემიერ-მინისტრთან შეხვედრის შემდეგ.
საქართველოს პრემიერ-მინისტრი იაპონიის ბიზნესწრეების წარმომადგენლებსაც შეხვდა.
როგორც გილაურმა განაცხადა, "იაპონურმა კომპანიებმა უკვე გამოსცადეს საქართველო, როგორც ძალიან მნიშვნელოვანი ეკონომიკური პარტნიორი, როგორც ძალიან მნიშვნელოვანი სავაჭრო პარტნიორი".
"მათ ჩამოაქვთ საქართველოში პროდუქცია და საქართველოდან ყიდიან მერე უკვე მთელ რეგიონში: აზერბაიჯანში, სომხეთში, ყაზახეთში, შუა აზიაში. შემდეგი ეტაპი არის საქართველოში პროდუქციის წარმოება. მნიშვნელოვანია ის, რომ გარდა "მსოფლიო ბანკისა", "აზიის განვითარების ბანკისა" და გარდა "ევროპის განვითარების ბანკისა", კიდევ ერთი იაპონური საინვესტიციო ბანკი საკმაოდ აქტიურია საქართველოში, რომელიც ახორციელებს ინფრასტრუქტურაში ინვესტიციებს. ეს არის "ჯაიკა", რომელიც წელს დააფინანსებს 200 მილიონ დოლარიან პროექტს. საუბარია საგზაო ინფრასტრუქტურაზე, ზესტაფონი - სამტრედია. ასევე საგზაო ინფრასტრუქტურაში ლარსის მიმართულებით შეიძლება ჩვენ ველოდოთ იაპონიის მხრიდან დაფინანსებას", - აღნიშნა გილაურმა.
