საქართველოს წმინდა საერთაშორისო საინვესტიციო პოზიციამ 2012 წლის პირველი კვარტალის ბოლოს -13.9 მლრდ აშშ დოლარი (-23.1 მლრდ ლარი) შეადგინა, რაც წინა წლის შესაბამისი პერიოდის მაჩვენებელს -1.8 მლრდ აშშ დოლარით (-3.0 მლრდ ლარით) აჭარბებს. ხოლო გასული პერიოდის ანალოგიურ მაჩვენებელს კი -485.3 მლნ აშშ დოლარით (805.6 მლნ ლარით).
საანგარიშო პერიოდის მთლიანი ზრდის 78.8 პროცენტი ოპერაციული ცვლილებით იყო გამოწვეული; 9.2 პროცენტი - საკურსო ცვლილებით; 4.1 პროცენტი - ფასის ცვლილებით; ხოლო 8.0 პროცენტი - სხვა ცვლილებით. 2012 წლის 31 მარტის მდგომარეობით მთლიანი საერთაშორისო აქტივები 4.8 მლრდ აშშ დოლარია (8.0 მლრდ ლარი). მათში 58.5 პროცენტი სარეზერვო აქტივებს უკავია; 18.1 პროცენტი - პირდაპირი ინვესტიციებს; 13.7 პროცენტი ნაღდი ფულის და დეპოზიტების წილად მოდის; 7.4 პროცენტს სავაჭრო კრედიტები შეადგენს; 1.8 პროცენტს - სესხები; ხოლო 0.1 პროცენტს პორტფელის ინვესტიციები და ფინანსური წარმოებულები. სარეზერვო აქტივები, 2011 წლის 31 მარტთან შედარებით, 98.1 მლნ აშშ დოლარით (162.9 მლნ ლარით) გაიზარდა და 2012 წლის 31 მარტის ბოლოს 2.8 მლრდ აშშ დოლარს (4.7 მლრდ ლარს) გაუტოლდა. აქედან 138.5 მლნ აშშ დოლარი (229.9 მლნ ლარი) ოპერაციული ცვლილება იყო, -43.3 მლნ აშშ დოლარი (-71.9 მლნ ლარი) - საკურსო, ხოლო 3.0 მლნ აშშ დოლარი (4.9 მლნ ლარი) - ფასის ცვლილება. სარეზერვო აქტივების ასეთი მოკრძალებული ზრდა გამოწვეულია იმით, რომ ეროვნულმა ბანკმა გასული წლის დეკემბრიდან დაიწყო საერთაშორისო სავალუტო ფონდის კრედიტის გადახდები.
რაც შეეხება ვალდებულებებს, საანგარიშო პერიოდისთვის, მთლიანმა ვალდებულებებმა 18.7 მლრდ აშშ დოლარი (31.1 მლრდ ლარი) შეადგინა, რაც გასული წლის ანალოგიური პერიოდის მაჩვენებელს 2.0 მლრდ აშშ დოლარით (3.3 მლრდ ლარით) აღემატება. პირდაპირი ინვესტორებისადმი ვალდებულებები, წინა წლის შესაბამის პერიოდთან შედარებით, 14.3 პროცენტით გაიზარდა და 9.6 მლრდ აშშ დოლარს (16.0 მლრდ ლარს) გაუტოლდა. პორტფელის ინვესტიციის ვალდებულებები წინა წლის შესაბამის პერიოდთან შედარებით 14.8 პროცენტით გაიზარდა და 1.4 მლრდ აშშ დოლარს (2.3 მლრდ ლარს) გაუტოლდა. აქედან, 618.3 მლნ აშშ დოლარი (1.0 მილიარდ ლარი) სამთავრობო ევრობონდებია, ხოლო 264.7 მლნ აშშ დოლარი (439.5 მლნ ლარი) საქართველოს რკინიგზის ობლიგაციები. აქ ასევე შედის სახაზინო ვალდებულებები, რომელიც არარეზიდენტებმა შეიძინეს, სულ - 82.7 მლნ აშშ დოლარი (137.2 მლნ ლარი).
წინა წლის შესაბამის პერიოდთან შედარებით, სხვა ინვესტიციები, საანგარიშო პერიოდის ბოლოსათვის, 8.9 პროცენტით გაიზარდა და 7.7 მლრდ აშშ დოლარი (12.8 მლრდ ლარი) შეადგინა. მასში 6.2 მლრდ აშშ დოლარი (10.3 მლრდ ლარი) სესხებს უჭირავს. ეროვნული ბანკის სასესხო ვალდებულებები 2012 წლის მარტის ბოლოსთვის წინა წლის ანალოგიურ პერიოდთან შედარებით 15.5 პროცენტით შემცირდა და 560.0 მლნ აშშ დოლარი (929.7 მლნ ლარი) შეადგინა. სამთავრობო სექტორის სასესხო ვალდებულებები 7.0 პროცენტით გაიზარდა გრძელვადიანი ვალდებულებების ზრდის ხარჯზე. საბანკო სექტორის სასესხო ვალდებულებები 4.5 პროცენტით არის გაზრდილი. აქედან, გრძელვადიანი ვალი 1.6 პროცენტით შემცირდა, ხოლო მოკლევადიანი ვალი 33.9 პროცენტით გაიზარდა და 305.0 მლნ აშშ დოლარი (506.3 მლნ ლარი) შეადგინა. გასული წლის შესაბამისი პერიოდის მიმართ, ვალდებულებები ნაღდი ფულის და დეპოზიტების სახით, 46.7 პროცენტით გაიზარდა და 595.8 მლნ აშშ დოლარი (989.0 მლნ ლარი) შეადგინა.
2011 წლის მარტის ბოლოსათვის, ეროვნული ბანკის სხვა გრძელვადიანმა ვალდებულებებმა 223.1 მლნ აშშ დოლარი (370.3 მლნ ლარი) შეადგინა, რაც განაწილებულ ნასესხობის სპეციალურ უფლებებს წარმოადგენს.