მაუწყებლების სავალდებულო ტრანზიტის ვალდებულების ვადებთან დაკავშირებით, კამპანია "ეს შენ გეხება" ბრძოლას გააგრძელებს. კამპანიის წევრები დადებითად აფასებენ ე.წ. "მასთ ქერისთან" დაკავშირებით მიღწეულ შეთანხმებებს მმრთველ გუნდთან, თუმცა მიიჩნევენ, რომ აღნიშნული პრინციპი, არჩევნების სამივე ეტაპზე უნდა გავრცელდეს.
როგორც "ეს შენ გეხებას" წევრმა ლაშა ტუღუშმა ჟურნალისტებთან განაცხადა, კამპანიის ფარგლებში ჯერ დეტალებზე არ უმსჯელიათ, თუმცა, შესაძლოა, საკანონმდებლო ინიციატივის წარდგენის მიზნით, არანაკლებ 30 ათასი ხელმოწერის შეგროვების პროცესი განაახლონ.
"ვფიქრობ, გავაგრძელებთ კამპანიას ვადების გარძელებასთან დაკავშირებით. მე საერთოდ მიმაჩნია, რომ ეს კანონი უვადო უნდა იყოს, მაგრამ "ეს შენ გეხებას" ფარგლებში მოვიფიქრებთ რაიმე ფორმას, თუმცა ჯერ ამაზე საუბარი არ გვქონია", - განაცხადა ტუღუშმა.
მისი განმარტებით, 30 ათასი ხელმოწერის შეგროვების პროცესი კამპანიამ იმის გამო შეაჩერა, რომ მმართველმა გუნდმა თავად წარადგინა ინიციატივა. ამჟამად კი, ტუღუშის თქმით, "ეს შენ გეხებამ" შესაძლოა ხელმოწერების შეგროვება დაიწყოს, რაზედაც ჯერ შეთანხმდებიან.
საპარლამენტო უმრავლესობაში არჩევნების დღის შემდეგ, მაუწყებლების სავალდებულო ტრანზიტის ვალდებულების გაგრძელების საჭიროებას ვერ ხედავენ.
