ივ. ჯავახიშვილის სახელობის თბილისის სახელმწიფო უნივერსიტეტს ნატოს გენერალური მდივნის მოადგილე ალექსანდრე ვერშბოუ ეწვია. ვერშბოუ თსუ-ისა და საქართველოს სხვა უნივერსიტეტების სტუდენტებს შეხვდა. ნატოს გენერალური მდივნის მოადგილე ნატოს ჩიკაგოს სამიტის შედეგებსა და ნატო-საქართველოს ურთიერთობებს შეეხო.
"ჩვენ მხარს ვუჭერთ საქართველოს ტერიტორიულ მთლიანობას საერთაშორისო საზოგადოების მიერ აღიარებულ საზღვრებში. რა ნაბიჯები უნდა გადადგას საქართველომ ნატოსკენ მიმავალ გზაზე? ჩვენ არ ვიცით, რა იქნება შემდეგ, როგორი იქნება დღის წესრიგი, ან რა გადაწყვეტილებები იქნება მიღებული. ღია კართან მისაახლოებლად და მასში შესაბიჯებლად მთავარია ენთუზიაზმის შენარჩუნება, აუცილებელია რეფორმებისა და სხვადასხვა აქტივობის გაგრძელება. ღია კარი რეალობაა", - განაცხადა ვერშბოუმ სტუდენტებთან შეხვედრაზე.
ვერშბოუმ სტუდენტების კითხვებს უპასუხა.
"ნატოს თემა მნიშვნელოვანია არა მხოლოდ სტუდენტებისთვის, არამედ მთელი ქვეყნისთვის. დიდი ხანია ველოდებით ნატოს კარის გაღებას. ამიტომ ნებისმიერი შეხვედრა ამ ორგანიზაციის ასეთი მაღალი რანგის წარმომადგენელთან თავისთავად ძალიან საინტერესოა. ვერშბოუ მაღალი რანგის დიპლომატია. იგი ელჩი იყო რუსეთში საკმაოდ საინტერესო პერიოდში. სტუდენტებმა საინტერესო კითხვებზე ასევე საინტერესო პასუხები მიიღეს", - აღნიშნა რექტორმა ალექსანდრე კვიტაშვილმა.
როგორც ნატოს შესახებ საინფორმაციო ცენტრის დირექტორმა თენგიზ გოგოტიშვილმა აღნიშნა, ვერშბოუ საქართველოს თავდაცვის სამინისტროს მოწვევით ჩამოვიდა თავდაცვისა და უსაფრთხოების კონფერენციაზე დასასწრებად, რომელიც ბათუმში გაიმართება.
"ნატოს გენერალური მდივნის მოადგილემ თავად მოისურვა სტუდენტებთან შეხვედრა. ქართველ სტუდენტებს საშუალება ჰქონდათ უშუალოდ პირველწყაროსგან მიეღოთ ინფორმაცია საქართველო-ნატოს დღევანდელი ურთიერთობების შესახებ", - განაცხადა მან.
ვერშბოუ თბილისს 27 ივნისს ეწვია. მან ორმხრივი შეხვედრები ვიცე-პრემიერმინისტრ გიორგი ბარამიძესთან და პარლამენტის თავმჯდომარე დავით ბაქრაძესთან გამართა. ვერშბოუ ბათუმში დაესწრება თავდაცვისა და უსაფრთხოების კონფერენციას. ნატოს გენერალური მდივნის მოადგილე საქართველოს 29 ივნისს დატოვებს.
