დღეს ეროვნულ ბანკში ხელი მოეწერა შეთანხმებას საქართველოს ეროვნულ ბანკსა და „ზარაფხანას" შორის. შეთანხმების თანახმად საქართველოს ეროვნული ბანკის მიერ საკოლექციო და სხვა საჭიროებისათვის დამზადებული ლარის ბანკნოტების, მონეტების, ზოდებისა და ნუმიზმატიკური ფასეულობის შეძენა ამიერიდან „ზარაფხანის" საიუველირო მაღაზიათა ქსელშიც იქნება შესაძლებელი.
ურთიერთთანამშრომლობის შესახებ შეთანხმებას ხელი ეროვნული ბანკის აღმასრულებელმა დირექტორმა გიორგი მელაშვილმა და შპს „ზარაფხანის" გენერალურმა დირექტორმა გიორგი გეორბელიძემ მოაწერეს.

საკოლექციო ბანკნოტების და მონეტების, ასევე სხვადასხვა ზომის და წონის ოქროს საინვესტიციო მონეტების შეძენა აქამდე მხოლოდ ეროვნული ბანკის ფულის მუზეუმში იყო შესაძლებელი.

„ბოლო პერიოდში საგრძნობლად გაიზარდა ინტერესი საინვესტიციო მონეტების, ასევე საკოლექციო ფულის ნიშნების მიმართ. საქართველოში ჩამოსული ტურისტები ხშირად სტუმრობენ ეროვნული ბანკის ფულის მუზეუმს და იძენენ საკოლექციო ფულის ნიშნებსა და სხვა ფასეულობებს. ამიერიდან ადგილობრივ კოლექციონერებსაც და ქვეყნის სტუმრებსაც მიეცემათ შესაძლებლობა ზარაფხანის მაღაზიებშიც შეიძინონ მათთვის სასურველი პროდუქცია", - განაცხადა ეროვნული ბანკის აღმასრულებელმა დირექტორმა გიორგი მელაშვილმა.

ამ დროისათვის „ზარაფხანა" 10 საფირმო მაღაზიით ოპერირებს, აქედან 7 თბილისის ცენტრალურ უბნებშია განლაგებული ხოლო 3 საქართველოს სხვა ქალაქებში, კერძოდ ბათუმში, ქუთაისსა და ზუგდიდში. პირველ ეტაპზე საკოლექციო ფულის ნიშნები და საინვესტიციო მონეტები თბილისის 4 მაღაზიასა და ზაფხულის სეზონის გააქტიურებასთან დაკავშირებით ბათუმის მაღაზიაში გაიყიდება. მოთხოვნის ზრდასთან ერთად იგეგმება აღნიშნული სასუვენირე ატრიბუტიკის განთავსება სარეალიზაციოდ კომპანიის სხვა საფირმო მაღაზიებშიც.