თბილისში მიმდინარე მაღალი დონის სემინარზე, რომელსაც აღმოსავლეთ ევროპის, კავკასიისა და ცენტრალური აზიის ქვეყნების ეროვნული სტატისტიკური უწყებების წარმომადგენლები ესწრებიან, "საქსტატსა" და "ევროსტატს" შორის საქართველოში სტატისტიკური სისტემების გლობალური შეფასების თარიღი შეთანხმდება. როგორც სააგენტო "ჯი-ეიჩ-ენთან" საუბრისას "საქსტატის" აღმასრულებელმა დირექტორმა ზაზა ჭელიძემ განაცხადა, "ევროსტატის" მიერ სტატისტიკის გლობალური შეფასება სავარაუდოდ სექტემბერში ან ოქტომბერში მოხდება.
"ევროსტატთან" უნდა შევთანხმდეთ თუ კონკრეტულად როდის ჩატარდება საქართველოში სტატისტიკური სისტემების გლობალური შეფასება, რომელიც "ევროსტატმა" უნდა გააკეთოს და რომელიც იქნება ძირითადი სახელმძღვანელო დოკუმენტი თვითონ ჩვენი სტატისტიკური სისტემის ევროსტრუქტურებში ინტეგრაციის კუთხით. საქართველოში სტატისტიკური სისტემების გლობალური შეფასების ჩატარებაზე "ევროსტატთან" სავარაუდოდ სექტემბერზე ან ოქტომბერზე შევთანხმდებით და საქართველო გახდება ერთ-ერთი იმ ქვეყანათაგანი, სადაც ეს პროცესი უკვე განხორციელდა. საქართველოს სტრატეგიული, პოლიტიკური და ეკონომიკური მიზნებიდან გამომდინარე, გლობალური შეფასება ქვეყნისათვის მეტად მნიშვნელოვანი პროცესია. გარდა ამისა სტატისტიკის ხარისხი ევროპაში მეტად მნიშვნელოვანია. მოგეხსენაბათ ევროპაში კრიზისია და ათმაგად უფრო დიდი ყურადღება ექცევა სტატისტიკის სტანდარტების დაცვის ხარისხს"- განაცხადა ზაზა ჭელიძემ.
როგორც ცნობილია 27-29 ივნისს თბილისი ევროკავშირის სტატისტიკური უწყების - "ევროსტატის" ორგანიზებით აღმოსავლეთ ევროპის, კავკასიისა და ცენტრალური აზიის ქვეყნების ეროვნული სტატისტიკური უწყებების ხელმძღვანელებისათვის, მაღალი დონის სემინარს მასპინძლობს.
სემინარში მონაწილეობას იღებენ როგორც "ევროსტატის", ისე ევროკავშირის ცალკეული სახელმწიფოების წარმომადგენლები, აგრეთვე დსთ-ს 10 ქვეყნისა და თურქეთის სტატისტიკოსები.
სემინარის მონაწილეები წარმოადგენენ შესაბამისი უწყებების გამოცდილებას სტატისტიკური მონაცემების ხარისხის ამაღლებისა და ე.წ. მეტამონაცემების (მონაცემები მონაცემების შესახებ) სრულყოფის საკითხებში. განსაკუთრებული ყურადღება დაეთმობა რეგიონის ქვეყნებში არსებული მდგომარეობის ევროკავშირის სტანდარტებთან შესაბამისობას.
როგორც "საქსტატის" ხელმძღვანელი განმარტავს, ამ მასშტაბის სემინარი პირველად ტარდება არა მარტო საქართველოში არამედ რეგიონის მასშტაბითაც (წინა ორი სემინარი გერმანიასა და საბერძნეთში მოეწყო).
"ეს არის "ევროსტატის" მაღალი დონის სემინარი, რომელშიც 20 ქვეყნის წარმომადგენელი მონაწილეობს. უცხო ქვეყნის წარმომადგენლები სემინარზე წარმოდგენილნი არიან სტატისტიკის სამსახურის უფროსებისა და მოადგილეების დონეზე. სემინარი მნიშვნელოვანია იმიტომ, რომ ასეთი დონის შეხვედრა ჩვენთან პირველად ტარდება, სადაც ერთმანეთის გამოცდილების გაზიარება მოხდება. რაც მთავარია ამ სემინარის ძირითადი ორგანიზატორი "ევროსტატია" და საუბარია "ევროსტატის" მეთოდოლოგიების დანერგვაზე განვითარებად ქვეყნებში, მათ შორის საქართველოშიც. საქართველო ევროკავშირთან ინტეგრაციის გზაზე იმყოფება და ასეთი დონის შეხვედრა ჩვენთვის მნიშვნელოვანია", - აღნიშნა "საქსტატის" აღმასრულებელმა ხელმძღვანელმა.
