კონკურსის ორგანიზატორია „ხელოვნების აკადემია", რომელიც 2010 წელს ცნობილი პიანისტის ვალერიან შიუკაშვილის ინიციატივით, სრულიად საქართველოს კათოლიკოს-პატრიარქის ილია მეორეს და თბილისის მერიის მხარდაჭერით დაფუძნდა.
კონკურსი 9-25 ივნისს მიხეილ თუმანიშვილის კინომსახიობთა თეატრში ჩატარდა და მასში 12-19 წლის 104 მოზარდმა მიიღო მონაწილეობა.

მონაწილეთაგან ფინალში 20 მოზარდი გადავიდა, მათგან 10 ლაურიატი გახდა, დანარჩენი კი- დიპლომანტი. პირველი პრემია გადაეცა ვლადიმერ ქავთარაშვილს და დავით წერეთელს, რომლებიც 12 წლამდე ასაკის მონაწილეთა კატეგორიაში გამოდიოდნენ. კონკურსანტების მუსიკალურ შესაძლებლობებს აფასებდა ჟიური საქართველოს კომპოზიტორთა კავშირის თავმჯდომარე კახა ცაბაძის, კომპოზიტორ ვაჟა აზარაშვილის და პიანისტ ვალერიან შიუკაშვილის შემადგენლობით.
კონკურსის გალა-კონცერტი და დაჯილდოება 25 ივნისს გაიმართა. გამარჯვებულები ჟიურის წევრებმა და საერთაშორისო მუსიკალური ფესტივალის „ჩვენებურები" ორგანიზატორმა გიული ალასანიამ დააჯილდოვეს.
აგრეთვე ქართული ხელოვნების და მომავალი თაობის კულტურულ განვითარებაში შეტანილი წვლილისათვის სპეციალური საერთაშორისო დიპლომი და პრიზი „ოქროს არტი" მიიღო კომპანია „თელასმა". ჯილდო გადაეცა სს „თელასის" საზოგადოებასთან ურთიერთობის დეპარტამენტის უფროსს ვალერი ფანცულაიას.
სს „თელასი", 2011 წლის ნოემბრიდან „ხელოვნების აკადემიის" გენერალური სპონსორია. კონკურსების შედეგად გამოვლენილი ნიჭიერი ახალგაზრდები სტიპენდიებს „თელასის" დაფინანსებით მიიღებენ, დაესწრებიან მასტერკლასებს, მონაწილეობას მიიღებენ კონცერტებში, გამოფენებში, ლიტერატურულ საღამოებში და კონკურსებში როგორც საქართველოში, ასევე უცხოეთში. ტარდება ლიტერატურული, კლასიკური მუსიკის, ფერწერის და ქართული მუსიკის კონკურსები. 2012 წლის მანძილზე „ხელოვნების აკადემიის" კონკურსის ოცი ლაურიატი „თელასის" სტიპენდიას მიიღებს.
კომპანია „თელასი" მომავალშიც გააგრძელებს პროექტების მხარდაჭერას, რომლებიც ქართული კულტურის და ხელოვნების განვითარებას უწყობს ხელს.