2012 წლის 25 ივნისს 1:30 საათზე სასტუმროში "თბილისი მარიოტი" გაიმართება ექსპორტის მართვის სკოლის პრეზენტაცია, რომლის ინიციატორიც არის საქართველოს ეროვნული საინვესტიციო სააგენტო. ექსპორტის მენეჯერების სასერტიფიკატო კურსს განახორციელებს კავკასიის ბიზნესს კოლა, რომელიც კურსის წარმატებით დასრულების შემდეგ გასცემს სერტიფიკატს (Certified Export Manager).
საქართველოს საექსპორტო პოტენციალი საგრძნობლად იზრდება, შესაბამისად საქართველოს ეროვნული საინვესტიციო სააგენტო აქტიურად ახდენს ქართული პროდუქციის პოპულარიზაციას საზღვარგარეთ. სხვადასხვა ექსპორტზე ორიენტირებულ კომპანიებთან მუშაობამ აჩვენა, რომ ბაზარზე არის მზარდი მოთხოვნა პროფესიონალ ექსპორტის მენეჯერებზე. სწორედ ამიტომ საინვესტიციო სააგენტოს ექსპორტის ხელშეწყობის სამსახურმა გადაწყვიტა ექსპორტის განათლების სკოლის ჩამოყალიბება. გამომდინარე იქიდან, რომ პროექტი საერთო საზოგადოებრივი და საჯარო ინტერესების რეალიზებისკენ არის მიმართული, პირველ საპილოტე კურსს ნაწილობრივ დააფინანსებს საინვესტიციო სააგენტო.
პროგრამის ხანგრძლივობა 3 დან 4 თვემდე განისაზღვრა. მსმენელთა შერჩევა მოხდება წერითი გამოცდისა და ზეპირი გასაუბრების საფუძველზე. პროგრამის მსმენელთათვის სავალდებულოა ინგლისური ენის ცოდნა. პირველ ეტაპზე კონკურსის წესით ივარაუდება 20-დან 25-მდე მსმენელის მიღება.
პროგრამის ხანგრძლივობა 3 დან 4 თვემდე განისაზღვრა. მსმენელთა შერჩევა მოხდება წერითი გამოცდისა და ზეპირი გასაუბრების საფუძველზე. პროგრამის მსმენელთათვის სავალდებულოა ინგლისური ენის ცოდნა. პირველ ეტაპზე კონკურსის წესით ივარაუდება 20-დან 25-მდე მსმენელის მიღება. სწავლების კურსი შემუშავებულია GIZ-ის (გერმანიის საერთაშორისო თანამშრომლობის ორგანიზაცია) ბრიტანელი ექსპერტის მიერ მსოფლიოში ყველაზე წარმატებულ ირლანდიურ მოდელზე (Enterprise Irland) დაყრდნობით.
CEM პროგრამის მიზანია ექსპორტის მართვის სკოლის ბაზაზე ექსპორტის სერტიფიცირებული მენეჯრების მომზადება, რომლებიც შეიძენენ სათანადო პრაქტიკულ და თეორიულ უნარჩვევებს მიღებული ცოდნის პრაქტიკაში დასანერგად. მსმენელთა წახალისებისა და პრაქტიკული უნარჩვევების განვითარების მიზნით კურსის მონაწილე ყველა მსურველს მიეცემა შესაძლებლობა გაიაროს სტაჟირება საინვესტიციო სააგენტოს ექსპორტის ხელშეწყობის სამსახურის საინფორმაციო ცენტრში.
ექსპორტის სერტიფიცირებული მენეჯერების კურსის პროგრამა შედგება როგორც თეორიული ასევე პრატიკული ნაწილისგან. პროგრამა ძირითადად აგებული იქნება პრეცენდენტებით სწავლების (Case Study) მეთოდზე. ლექციებს წაიკითხავენ გამოცდილი ქართველი და უცხოელი პრაქტიკოსი ექსპერტები, ასევე ექსპორტის მოდელს გაუზიარებენ სპეციალურად მოწვეული კომპანიების წარმომადგენლები. კურსი ასევე მოიცავს ტურებს
საექსპორტო კომპანიებში, საბაჟოზე და ა.შ.
კურსის წარმატებით გავლის შემთხვევაში, მოხდება საექსპორტო კომპანიების არსებული და პოტენციური თანამშრომლების უნარ-ჩვევების გაუმჯობესება საერთაშორისო გაყიდვების საწარმოებლად, რაც საბოლოო ჯამში დამქირავებელი კომპანიის საექსპორტო გაყიდვების ზრდაზე და დივერსიფიცირებაზე იმოქმედებს.
საინვესტიციო სააგენტო აღნიშნული პროექტის მეშვეობით ცდილობს აამაღლოს საწარმოთა საექსპორტო აქტივობა, რაც საბოლოო ჯამში დადებითად აისახება ქვეყნის საექსპორტო მაჩვენებლის ზრდაზე.
