2012 წლიდან სახელმწიფო ბიუჯეტი სრულად გადავიდა პროგრამულ დაგეგმარებაზე, ბიუჯეტის დაგეგმვის პროცესშივე განისაზღვრება თითოეული პროგრამის განხორციელებით მოსალოდნელი შედეგები, რაც სახელმწიფო ფინანსების უფრო ეფექტურად მართვის საშუალებას იძლევა და ზრდის საბიუჯეტო პროცესის გამჭირვალობას. 2013 წლიდან პროგრამულ ბიუჯეტებზე გადადიან ადგილობრივი თვითმმართველი ერთეულები.
ადგილობრივი თვითმმართველობის დონეზე პროგრამული ბიუჯეტის დანერგვის მიზნით ფინანსთა სამინისტრო გერმანიის საერთაშორისო თანამშრომლობის საზოგადოებისა (GIZ) დაამერიკის შეერთებული შტატების საერთაშორისო განვითარების სააგენტოს (USAID) მხარდაჭერით განაგრძობს ტრენინგებს თვითმმართველი ერთეულების წარმომადგენლებისთვის.
მიმდინარე წლის 21 ივნისს, 12 საათზე, ფინანსთა სამინისტროს აკადემიის სასწავლო კომპლექსში იწყება სამდღიანი ტრენინგი კახეთის რეგიონში შემავალი თვითმმართველი ერთეულებისათვის, რომელსაც ფინანსთა მინისტრის პირველი მოადგილე პაპუნა პეტრიაშვილი გახსნის. სწავლებას დაესწრებიან GIZ-სა და USAID-ის წარმომადგენლები.
ტრენინგის ფარგლებში განიხილება პროგრამული ბიუჯეტის დანერგის მიზნით ფინანსთა სამინისტროს მიერ შემუშავებული მეთოდოლოგია და ინსტრუქციები,მოსალოდნელი შედეგებისა და შეფასების ინდიკატორების სწორად ჩამოყალიბების მიზნით გაიმართება პრაქტიკული მეცადინეობები. სემინარის მონაწილეებსმიაწვდიან ინფორმაციას 2012 წელს ეკონომიკაში მიმდინარე ტენდენციების შესახებ.
ფინანსთა სამინისტროს მიერ ორგანიზებული სემინარი აკადემიის სასწავლო კომპლექსში თვის ბოლომდე გაგრძელდება და ტრენინგს ყველა თვითმმართველი ერთეული გაივლის. სწავლება მათ დაეხმარებათ შეიძინონ მეტი ცოდნა და გამოცდილება პროგრამული ბიუჯეტის შემუშავების კუთხით. კანონმდებლობის შესაბამისად, მიმდინარე წლის ნოემბერში საკრებულოებს 2013 წლის ბიუჯეტი დასამტკიცებლად უკვე პროგრამული ფორმატით წარედგინებათ.