საქართველოს, თეატრის, მუსიკის, კინოსა და ქორეოგრაფიის სახელმწიფო მუზეუმი 85 წლის იუბილესთან დაკავშირებით იწყებს დავით არსენიშვილის ხსოვნისადმი მიძღვნილ ახალ ინოვაციურ პროექტს, სახელწოდებით "აღმოაჩინე ახალი მხატვარი".
პროექტში მონაწილეობის მიღება შეუძლია ნებისმიერი ასაკის და პროფესიის ადამიანს. ნამუშევერები შეიძლება წარმოდგენილი იყოს ნებისმიერ ჟანრში (ფერწერა, კინომხატვრობა, სცენოგრაფია, ქანდაკება, კარიკატურა, ხელნაკეთი ნივთები, ქსოვილი, ვიდეოარტი, ინსტალაცია ).
პროექტში მონაწილე მხატვრების ნამუშევრები ხელოვნების სასახლეში დავით არსენიშვილის დარბაზში გამოიფინება. გამოფენის შემდეგ მხატვართან შეთანხმებით ერთი ნამუშევარი მუზეუმის კოლექციაში დარჩება, რაც, ერთი მხრივ, უზრუნველყოფს ეროვნული კოლექციების ახალი ნამუშევრებით შევსებას და, ამასთანავე, მხატვრის მომავალ წარმატებულ პროფესიულ კარიერას.
XX საუკუნის დასაწყისში დიმიტრი შევარდნაძისა და კირილე ზდანევიჩის თაოსნობით საქართველოში მოძრაობა დაიწყო, რომელიც მხატვრობაში ახალი სახეებისა და შედევრების გამოვლენას ისახავდა მიზნად. ამ მოძრაობას ბევრი მნიშვნელოვანი გამოფენა და დიდი მხატვრის აღმოჩენა მოჰყვა, მათ შორის იყო ნიკო ფიროსმანიც. თითქმის საუკუნის შემდეგ საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმი იმავე პროცესის განხორციელებას იწყებს.
