მსოფლიო ბანკის რეგიონულ დირექტორად სამხრეთ კავკასიაში ჰენრი კერალი დაინიშნა. როგორც სააგენტო "ჯი-ეიჩ-ენს" საქართველოი მსოფლიო ბანკის წარმომადგენლობიდან აცნობეს, კერალი თავის მოვალეობების შესრულებას 2012 წლის 1 ივლისიდან შეუდგება. კერალი გაუძღვება მსოფლიო ბანკის პროგრამა სამ ქვეყანაში - აზერბაიჯანი, საქართველო, სომხეთი -- და ამ ქვეყნებში ბანკის თანამშრომლობის სტარტეგიების მომზადებასა და განხორციელებას. იგი, ასევე, წარმართავს დიალოგს სამოქალაქო საზოგადოების წარმომადგენლებთან და სხვა სტრატეგიულ პარტნიორებთან. კერალი იმუშავებს მსოფლიო ბანკის სამხრეთ კავკასიის რეგიონალური ოფისიდან თბილისში.
ჰენრი კერალის აქვს მუშაობის გამოცდილება მსოფლიოს სხვადასხვა რეგიონში, რომელთა შორისაა სამხრეთ ამერიკა, აფრიკა, აღმოსავლეთ და სამხრეთ აზია, ევროპა და ცენტრალური აზია. უკანასკნელ პერიოდში ის მუშაობდა ტრანსპორტის სექტორის ხელმძღვანელად და უძღვებოდა ბანკის მიერ ევროპასა და ცენტრალურ აზიაში დაფინანსებულ პროექტებს ტრანსპორტის სფეროში.
2003 წელს მსოფლიო ბანკში მუშაობის დაწყებამდე, კერალი ასწავლიდა ბირმინჰემის უნივერსიტეტში ინგლისში, სადაც იგი ტრანსპორტის ინფრასტრუქტურის განვითარების საკითხებზე მუშაობდა. იგი ხელმძღვანელობდა ხარჯების ეფექტიანობის ეკონომიკური მოდელების კვლევას ინფრასტრუქტურაში ინვესტიციების მიზანშეწონილობის შეფასების მიზნით.
კერალის აქვს ორმაგი მოქალაქეობა: იგი არის როგორც უგანდის, ასევე დიდი ბრიტანეთის მოქალაქე. თავდაპირველად მან ინჟინრის განათლება უგანდაში მიიღო. ამის შემდეგ, კერალის მიღებული აქვს მაგისტრის ხარისხი და დოქტორის წოდება ინგლისში, ბირმინჰემის უნივერსიტეტში. იგი მრავალი პუბლიკაციის ავტორია.
შეგახსენებთ, რომ სამხრეთ კავკასიაში მსოფლიო ბანკის რეგიონალური დირექტორის თანამდებობაზე ჰენრი კერალი ასად ალამს შეცვლის, რომელიც სამუშაოდ ქალაქ პრეტორიაში გადადის, სადაც იგი დაინიშნა მსოფლიო ბანკის რეგიონალურ დირექტორად სამხრეთ აფრიკის რეგიონში.
