თბილისის მერი გიგი უგულავა ნორიოს ქუჩაზე მცხოვრებ ნიკოლაიშვილებს ოჯახის ექიმთან ერთად ესტუმრა, მათი მდგომარეობით დაინტერესდა და სახელმწიფო დაზღვევის ახალი პროექტის შესახებ ესაუბრა. ოჯახის ექმიმმა 4 წლის ავთანდილ ნიკოლაიშვილი გასინჯა, რომელიც ხშირად ავადმყოფობს. აღნიშნული სამედიცინო მომსახურებით ოჯახი უსახსრობის გამო ვერ სარგებლობდა. ნიკოლაიშვილების ოჯახს სოციალურად დაუცველის სტატუსი სუბსიდიების სააგენტომ ივნისში მიანიჭა და შესაბამისად ისინი სოციალური პაკეტის ფარგლებში, ყველა იმ შეღავათით ისარგებლებენ, მათ შორის დაზღვევითაც, რომლითაც აღნიშნული კატეგორიის სხვა ოჯახები სარგებლობენ.
თბილისის მერიის ინფორმაციით, ჯანდაცვის სფეროს განვითარება, გამართული სადაზღვევო სისტემის არსებობა და ხარისხიანი სამედიცინო მომსახურების ხელმისაწვდომობა სახელმწიფოს მთავარი პრიორიტეტია. თბილისის მერიის მიერ თბილისში 300 000 სხვადასხვა კატეგორიის თბილისელია დაზღვეული, მათ შორის 58 500 სოციალურად დაუცველია. 2012 წლის პირველი სექტემბრიდან ძალაში შედის სახელმწიფო დაზღვევის ახალი პროექტი, რომლის მიხედვით დაზღვეული იქნება ყველა პენსიონერი და 6 წლამდე ასაკის ბავშვი. შესაბამისად თბილისში სექტემბრიდან ნახევარ მილიონამდე ადამიანი იქნება დაზღვეული. დაზღვევის ერთიანი პაკეტი 24 საათიან საკონსულტაციო მომსახურებას, ოჯახის ექიმის, გადაუდებელ, გეგმურ-ჰოსპიტალურ და ამბოლატორიულ მომსახურებას, მშობიარობასა და მედიკამენტებზე შეღავათებს ითვალისწინებს.
