10 ივნისს, 17:00 საათზე, თბილისში, კუს ტბის ტერიტორიაზე, გაიმართება აქცია "საქართველოს მარათონი სიცოცხლის გადასარჩენად", რომლის ფარგლებშიც მოეწყობა რბოლა - გამარჯვებულების დაჯილდოება, მსვლელობა და ნიაზ დიასამიზე - 33ა-ს საქველმოქმედო კონცერტი ღია ცის ქვეშ.
მარათონს ორგანიზებას უწევს ქალთა ჯანმრთელობისა და კეთილდღეობის კავშირი "ჰერა", ორგანიზაციის ერთ-ერთი მიზანი ქალთა რეპროდუქციული სისტემის სიმსივნეების ნაადრევ ეტაპზე გამოვლენის ხელშეწყობაა.
მსგავსი აქცია უკვე მეშვიდედ იმართება საქართველოში, იგი ერთგავრ ტრადიციად ჩამოყალიბდა. 2005 წლიდან, 3 წლის განმავლობაში, მარათონი იმართებოდა ქ. ქუთაისში, ხოლო 2009 წლიდან "საქართველოს მარათონი სიცოცხლის გადასარჩენად" თბილისში დაფუძნდა და გადაიქცა მნიშვნელოვან აქციად. 10 000-მდე მონაწილის, საქართველოში მოღვაწე უცხოელი მოქალაქეების დამსახურებაა, რომ ამ აქციის საშუალებით ხდება ძუძუს კიბოს წინააღმდეგ ბრძოლის შესახებ მოსახლეობის ინფორმირებულობის ზრდა.
მსგავსი აქციები პოპულარობით სარგებლობს აშშ-სა და სხვა განვითარებულ ქვეყნებში. სუზან კომენის სარძევე ჯირკვლის კიბოს ფონდის დამფუძნებელმა ნენსი ბრიკერმა 1983 წელს პირველად მსოფლიოში მოაწყო "მარათონი გადარჩენისთვის". მარათონმა დიდი გამოხმაურება ჰპოვა მოსახლეობაში და აშშ-ში ტრადიციად იქცა.
ძუძუს კიბოთი გამოწვეული სიკვდილობის რაოდენობით საქართველოს წამყვანი ადგილი უჭირავს ევროპაში. ძირითადი მიზეზი ინფორმაციის ნაკლებობაა. მოსახლეობის უმრავლესობამ ნაკლებად იცის, რომ ადრეულ ეტაპზე გამოვლენილი დაავადება სიცოცხლის შენარჩუნების გარანტიაა. აქედან გამომდინარე, მარათონის მიზანია საზოგადოების ინფორმირება სარძევე ჯირკვლის კიბოს ნაადრევი გამოვლენის მნიშვნელობის შესახებ. ვიმედოვნებთ, რომ აქცია ხელს შეუწყობს ქალთა ჯანმრთელობის მდგომარეობის გაუმჯობესებას და სამოქალაქო საზოგადოების აქტივობის გაზრდას საქართველოში.
2012 წლის საქართველოს "მარათონი სიცოცხლის გადასარჩენად" ტარდება პარტნიორი ორგანიზაციების და სპონსორების მხარდაჭერით: USAID SUSTAIN - აშშ საერთაშორისო განვითარების სააგენტოს შენარჩუნების პროგრამა, სუზან კომენის სარძევე ჯირკვლის (ძუძუს) კიბოს ფონდი, JSI - ჯეი-ეს-აი, ეროვნული სკრინინგ ცენტრი, საქართველოს შრომის, ჯანმრთელობისა და სოციალური დაცვის სამინისტრო, დაავადებათა კონტროლისა და საზოგადოებრივი ჯანმრთელობის ეროვნული ცენტრი, რეპროდუქციული ჯანმრთელობის საბჭო, შავი ზღვის ქვეყნების კოალიცია ძუძუსა და საშვილოსნოს ყელის კიბოს პრევენციისათვის, ბრითიშ პეტროლიუმი, პროკრედიტ ბანკი, შპს "გეოპლანტი", ბანკი "რესპუბლიკა", ბორჯომის წყაროები, კოკა-კოლა, IWA-ქალთა საერთაშორისო ასოციაცია, Georgian Bakers - ჯორჯიან ბეიკერს, ჯორჯიან ივენტს, ჰოფმან ლა-როში, სანტე, შერატონ მეტეხი პალასი, ბერძნული კლინიკა "ჰიპოკრატე", გუდვილი, PRIME TIME, რადიო "ფორტუნა", საზოგადოებრივი მაუწყებლის პირველი არხი.
