შრომის ჯანმრთელობისა და სოციალური დაცვის მინისტრმა ზურაბ ჭიაბერაშვილმა ქ. ბათუმში შპს „რეფერალური დახმარების ცენტრის" ქვესადგური გახსნა. მინისტრი იქ დასაქმებულ პერსონალს შეხვდა და ცენტრის მუშაობას დეტალურად გაეცნო.
ახლადგახსნილი გადაუდებელი სამედიცინო დახმარების ქვესადგური თანამედროვე სტანდარტების შესაბამისი ორი რეანომობილით აღიჭურვა. მანქანები დაკომპლექტებულია მაღალტექნოლოგიური აპარატურით, რაც უმძიმეს მდგომარეობაში მყოფი პაციენტების ტრანსპორტირების საშუალებას იძლევა. ორივე მანქანა აღჭურვილია GPS სანავიგაციო სისტემით. სისტემა შესაძლებელს ხდის გაკონტროლდეს რეანომობილების მდებარეობა და გადაადგილება.
ერთი რეანომობილი განკუთვნილია ახალშობილთა ტრანსპორტირებისთვის და უზრუნველყოფს აჭარის რეგიონიდან პაციენტის გადაყვანას ბათუმის, ქუთაისის და თბილისის ბავშვთა საავადმყოფოებში.
რეფერალური დახმარების ცენტრის ბათუმის ქვესადგური მაღალკვალიფიციური კადრებით დაკომპლექტდა. ცენტრში მუშაობს 4 ექიმი-რეანიმატოლოგი, 1 ექთანი და მძღოლი, რომლებიც პაციენტებს ყოველდღე, 24 საათიან რეჟიმში, მოემსახურებიან. ქვესადგურის მუშაობას კოორდინაციას გაუწევეს რეფერალური დახმარების ცენტრის თბილისის ოფისი.
შპს "რეფერალური დახმარების ცენტრი" არის გადაუდებელი დახმარების ორგანიზაცია, რომელსაც აქვს პაციენტთა პრეჰოსპიტალური მართვის 10 წლიანი გამოცდილება. ცენტრის ფუნქციას წარმოადგენს საქართველოს მასშტაბით მძიმე სამედიცინო შემთხვევების მართვა და პაციენტთა ტრანსპორტირება შესაბამის სამედიცინო დაწესებულებებში.
