მაია მიმინოშვილი ადასტურებს, რომ მისი ვაჟი ლაშა ყანჩაველი "ქართული ოცნების" 27 მაისს გამართულ საპროტესტო აქციაში მონაწილეობდა.
როგორც მიმინოშვილმა ჟურნალისტებს განუცხადა, იგი გუშინ საღამოს ტელეფონით ესაუბრა შვილს, რომელმაც უთხრა, რომ მეუღლესთან ერთად "ქართული ოცნების" მიერ ორგანიზებულ მსვლელობაში მონაწილეობდა.
"ჩემი შვილი ზრდასრული ადამიანია, ცხოვრობს ცალკე და თუ მისი გადაწყვეტილება და შეხედულებები არის ჩემი თანამდებობიდან დათხოვნის მიზეზი, ეს არის სრული კატასტროფა. აქამდე ისიც კი არ იცოდნენ, ჩემი შვილი გოგონა იყო თუ ვაჟი და საინტერესოა, ამდენ ადამიანში როგორ შეამჩნიეს მაინც და მაინც ჩემი შვილი. ერთადერთი წყარო ამისა, შესაძლოა, იყოს ჩვენი სატელეფონო საუბარი", - აღნიშნა მაია მიმინოშვილმა.
მისი განმარტებით, მინისტრს ეს მისი გათავისუფლების ოფიციალურ მიზეზად არ დაუსახელებია. როგორც მიმინოშვილი აცხადებს, დღეს დაუკავშირდა დიმიტრი შაშკინი და მასთან შეხვედრა მოითხოვა. მისი თქმით, შეხვედრა მინისტრთან დაახლოებით 2-3 წუთს გაგრძელდა.
"მან მხოლოდ მითხრა ის, რომ მიიღო გადაწყვეტილება ჩემი თანამდებობიდან გათავისუფლების შესახებ. ამით დასრულდა ჩვენი საუბარი და როდესაც ცენტრში დავბრუნდი სამინისტროს მიერ ეს განცხადება უკვე გავრცელებული დამხვდა", - აღნიშნა მიმინოშვილმა.
მისივე განმარტებით ცალკეულ საკითხებზე აზრთა სხვადასხვაობა მასსა და დიმიტრი შაშკინს შორის არსებობდა, თუმცა იგი ყოველთვის პირნათლად ასრულებდა იმ გადაწყვეტილებებს, რომლებსაც საბოლოო ჯამში მინისტრი იღებდა.
"ამ ეტაპზე ჩემთვის ყველაზე მთავარია არ დაზარალდეს ის საქმე, რომელსაც ამდენი წლის განმავლობაში ერთგულად ვემსახურებოდი. ვეცდები დავაშოშმინო ჩემი თანამშრომლები, რათა არ დაზიანდეს საერთო საქმე გამოცდების მიმდინარეობის ამ აქტიურ ფაზაში", - აღნიშნა მაია მიმინოშვილმა.
შგახსენებთ, რომ დღეს საქართველოს განათლებისა და მეცნიერების მინისტრმა მიიღო გადაწყვეტილება გამოცდების ეროვნული ცენტრის დირექტორის, მაია მიმინოშვილის თანამდებობიდან გათავისუფლების შესახებ. ოფიციალურ განცხადებაში, გათავისუფების მიზეზად განათლების სამინისტროს პოლიტიკასა და მაია მიმინოშვილის პირად პოზიციას შორის პრინციპული შეუთავსებლობაა დასახელებული.
