"მე არ შემიძლია გითხრათ იყო თუ არა ოფიციალური საუბრები ამ საკითხთან მიმართებაში", _ განაცხადა ისრაელის პრესის და დიასპორის სამინისტროს გენერალურმა დირექტორმა რონენ პლოტმა ჟურნალისტებთან საუბრისას ჯვრის მონასტერთან დაკავშირებით დასმულ კითხვაზე პასუხის გაცემისას.
"მე არ შემიძლია გითხრათ იყო თუ არა ოფიციალური საუბრები ამ საკითხთან მიმართებაში. როგორც ოფიციალურ პირი, ამის შესახებ არაფერი ვიცი. მე ვიცი, რომ ვიღაცამ რაღაც სატყუარა იქნა გადმოგდებული. იყო თუ არა ამაში რამე ან იქნება თუ არა მერე არვიცი, თუმცა, ამჟამად ამის შესახებ ჩემთვის ცნობილი არაფერია", _ განაცხადა რონენ პლოტმა.
შეგახსნებთ, რომ ბოლოს შეხვედრა ჯვრის მონასტრის თაობაზე საქართველოს პარლამენტის თავმჯდომარეს დავით ბაქრაძესა და იერუსალიმის პატრიარქ თეოფილე მესამეს შორის მიმდინარე წლის 16 მარტს გაიმართა. ბაქრაძემ ერთსაათიანი შეხვედრის განმავლობაში ჯვრის მონასტრის საკითხი არაერთხელ დასვა.
"ბევრი ქართველისთვის ჯვრის მონასტერი ისტორიული, ყველაზე მნიშვნელოვანი კულტურული ადგილია. ამას აბსოლუტურად ვეთანხმები. ამ პროცესთან დაკავშირებით ნებისმიერი გადაწყვეტილების თქვენთან შეთანხმება გვსურს. საინფორმაციო სააგენტოების მხრიდან არაერთი ინტერპრეტაცია მოვისმინეთ. მჯერა, რომ ყველა ეს პროცესი მონასტერთან მიმართებაში თქვენი საკუთრების უფლებისადმი პატივისცემით წარიმართება. ჩვენ პატივს ვცემთ ყველა იმ ქმედებას, რომელიც თქვენმა საპატრიარქომ უკანასკნელი სამასი წლის განმავლობაში აღნიშნული მონასტრის შენარჩუნებისთვის განახორციელა. ჩვენ ამ პროცესში ოფიციალური ისრაელის ჩართვაზე არ ვსაუბრობთ. ისრაელის მთავრობა მეგობრულადაა განწყობილი. მას მხოლოდ იმის შესახებ მივაწოდეთ ინფორმაცია, რომ საქართველომ იერუსალიმის ჯვრის მონასტრის დაბრუნების შესაძლებლობასთან დაკავშირებით კონსულტაციები უნდა დაიწყოს. აღნიშნული მონასტერი ჩვენს ისტორიაში მნიშვნელოვან როლს ასრულებს. მას ჩვენი აწმყოსა და მომავლისთვის მნიშვნელოვანი როლი აქვს. იმ კონსულტაციების განმავლობაში, რომელიც ისრაელის ხელისუფლებასთან ჩემი ვიზიტის ფარგლებში გავმართე (ქნესეთის სპიკერს, პრემიერს, საგარეო საქმეთა მინისტრს შევხვდი) მათ საქართველოს მიზნების შესახებ, ჯვრის მონასტრის საქართველოსთვის დაბრუნების შესაძლებლობაზე ვესაუბრე, მაგრამ თქვენ მთავარი ფიგურა ბრძნადებით, ვისთანაც ჩვენ ამ საკითხს ვაყენებთ. ჩვენ პატივს ვცემთ იერუსალიმის საპატრიარქოს, ჩვენს მეგობრებს ისრაელის მთავრობაში ამის შესახებ მხოლოდ ინფორმაცია მივაწოდეთ. ზოგიერთი საინფორმაციო საშუალება, განსაკუთრებით რუსულენოვანი საინფორმაციო სააგენტო ისრაელში პროვოკაციული ინფორმაციების გავრცელებით არის დაკავებული. მათ ჩვენი საგარეო საქმეთა და კულტურის სამინისტროების განცხადებების არასწორი ინტერპრეტაცია განახორციელეს. ამ პროცესში თქვენს როლსა და იმ კანონს, რომლის მიხედვითაც, ეს მონასტერი თქვენს საპატრიარქოს ეკუთვნის, პატივს ვცემთ. ასე რომ, ჯვრის მონასტრის საკითხთან დაკავშირებით თქვენი, ასევე საპატრიარქოს ძალიან მადლიერი ვართ", _ განაცხადა ბაქრაძემ პატრიარქთან შეხვედრისას.
