"პროკრედიტ ბანკმა" აშშ დოლარში გადახდების მაღალი ხარისხისთვის Deutsche Bank-ისგან ხარისხის აღიარების ჯილდო "STP Excellence Award" მიიღო. პროკრედიტ ბანკმა აღნიშნული ჯილდო მეშვიდედ მიიღო, რაც ბანკის მომსახურების მაღალ ხარისხზე ნათლად მიუთითებს.
ხარისხის აღიარების პრესტიჟული ჯილდო იმ წამყვან ფინანსურ დაწესებულებებს გადაეცემა, რომლებიც კლიენტებს თანამედროვე საერთაშორისო STP (straight through processing) ელექტრონული გადახდების მომსახურებას უწევენ და საკორესპონდენტო საბანკო მომსახურებისა და პროცესინგის სიზუსტის დაცვის მკაცრ კრიტერიუმებს აკმაყოფილებენ.
STP (straight through processing) ფინანსური კომპანიების მიერ ტრანზაქციების სიჩქარის ოპტიმიზაციისათვის გამოიყენება. ანგარიშსწორების პროცესში ელექტრონულად შეყვანილი ინფორმაცია ერთი მხარიდან მეორეს ისე გადაეცემა, რომ იმავე ინფორმაციის ხელმეორედ შეყვანა აღარაა საჭირო.
2011 წლის მონაცემებით, "პროკრედიტ ბანკი საქართველოს" ხარისხის მაჩვენებელმა 99,74 %-ს მიაღწია.
პროკრედიტ ბანკი მცირე და საშუალო ზომის საწარმოების კომპლექსურ მომსახურებაზე ორიენტირებული ერთ-ერთი წამყვანი ბანკია საქართველოში, რომელიც ფიზიკურ და იურიდიულ პირებს საბანკო პროდუქტების სრულ სპექტრს სთავაზობს. ბანკმა საქართველოში ფუნქციონირება 1999 წელს დაიწყო და ამჟამად ქვეყნის მასშტაბით 61 ფილიალი აქვს გახსნილი. ბანკი საერთაშორისო პროკრედიტ ჯგუფის წევრია, რომელიც წარმატებით ფუნქციონირებს აღმოსავლეთ ევროპის თერთმეტ, ლათინური ამერიკის შვიდ და აფრიკის სამ ქვეყანაში. პროკრედიტ ჯგუფს სათავეში უდგას სს პროკრედიტ ჰოლდინგი (მაინის ფრანკფურტი, გერმანია).
პროკრედიტ ბანკს საერთაშორისო სარეიტინგო სააგენტოსგან Fitch Ratings მინიჭებული აქვს BB რეიტინგი, რომელიც საქართველოში ყველაზე მაღალი შესაძლო რეიტინგია.
2011 წლის დეკემბრის მდგომარეობით, პროკრედიტ ბანკის აქტივებმა 972 მლნ ლარი (582 მლნ აშშ დოლარი) შეადგინა. დღესდღეობით "პროკრედიტ ბანკი, საქართველოს" მომსახურებით 332,000-მდე კლიენტი სარგებლობს.
