პრეზიდენტის პრესსპიკერმა ტრადციულ ბრიფინგზე დამოუკიდებლობის დღისადმი დაგეგმილ ღონისძიებებზე ისაუბრა. მანჯგალაძემ აღნიშნა, რომ 26 მაისს თბილისში პირველად გაიმართება სამრეწველო აღლუმი, სადაც საქართველოში დამზადებული პროდუქცია გამოიფინება.
,,დამოუკიდებლობის დღისადმი დაგეგმილი საზეიმო ღონისძიებები მინდა გითხრათ, რომ გაიმართება, როგორც საქართველოს დედაქალაქში ასევე ქუთაისში. ღონისძიებები იწყება თბილისში. საქართველოს დედაქალაქი პირველად უმასპინძლებს სამრეწველო აღლუმს სახელწოდებით ,,დამზადებულია საქართველოში". ღონისძიება, რომლის ფარგლებში ასეულობით საწარმო მონაწილეობს, საშუალება ექნებათ წარმოადგინონ საკუთარი პროდუქცია, ნაწარმი", _ განაცხადა ჟურნალისტებთან მანანა მანჯგალაძემ, რომელმაც აღნიშნა, რომ თბილისში გამართულ სამრეწველო აღლუმზე მნიშნელოვან ადგილს საქართველოში დამზადებული სამხედრო ტექნიკა დაიკავებს.
,,განსაკუთრებულ ადგილს აღლუმზე ვფიქრობ, დაიკავებს ქართული სამხედრო წარმოების ტექნიკა. ეს არის ,,ლაზიკა" და ,,დიდგორი", უპილოტო თვითმფრინავები და სხვა სახის ტექნიკა. ასე, რომ ერთი დღის განმავლობაში ჩვენს თანამამულეებსა და სტუმრებს საშუალება ექნებათ ნახონ საქართველოში დამზადებული ყველა პროდუქტი, ნაწარმი, რომელიც ქართულია და ადგილობრივია", _ განაცხადა პრეზიდენტის პრესსპიკერმა.
მისივე განცხადებით, 26 მაისს ქუთაისში საზეიმოდ გაიხსნება საქართველოს პარლამენტის შენობა, რომლის მშენებლობა სრულად შემოდგომაზე დასრულდება.
,,როგორც Yთქვენთვის არის ცნობილი 26 მაისს ქუთაისში გაიმართება პარლამენტის შენობის საზეიმო გახსნა, რომლის მშენებლობა სრულად დასრულდება უკვე შემოდგომაზე", _ განაცხადა მანჯგალაძემ, რომელმაც აღნიშნა, რომ პარლამენტის შენობა მზადაა საიმისოდ, რომ საზეიმო სხდომას უმასპინძლოს.
,,ბუნებრივია პარლამენტის შენობა მზად იქნება იმისათვის, რომ საქართველოს პარლმენტის პირველი საზეიმო სხდომა ქუთაისში გაიმართოს. ქუთაისში, როგორც საქართველოს საპარლამენტო დედაქალაქში".
მანანა მანჯგალაძის განცხადებით, წელს ქუთაისი სამხედრო აღლუმსაც უმასპინძლებს.
,,ამავე დღეს პირველად ქუთაიში გაიმართება ყოველწლიური საზეიმო სამხედრო აღლუმი, რომელიც 26 მაისს დამოუკიდებლობის დღესთან დაკავშირებით იმართება", _ განაცხადა ტრადიციულ ბრიფინგზე მანჯგალაძემ.
მისივე განცხადებით, დამოუკიდებლობის დღისადმი მიძღვნილი სხვადასხვა ღონისძიებები თბილისსა და ქუთაისში პარალელურ რეჟიმში გაიმართება,
"26-ე ქუთაისში დაგეგმილია საქართველოს დამოუკიდებლობის დღისადმი მიძღვნილი სხვადასხვა ღონისძიებები. ასეთი სახის ღონისძიებები თბილისშიც გაიმართება პარალელურ რეჟიმში", _ განაცხადა მანჯგალაძემ.
