დღეს, 20 მაისს, თბილისში, კოსტავას გამზირზე „თეგეტა მოტორსის" მხარდეჭერით გაიმართება ავტორალი ეტლით მოსარგებლე პირების, პროფესიონალი ავტომბროლელებისა და მათი მეგობრების მონაწილეობით. ღონისძიების ორგანიზატორები არიან შეზღუდული შესაძლებლობის მქონე პირთა სპორტის საკოორდინაციო საბჭო და „მოძრაობა ხელმისაწვდომი გარემოსათვის". ღონისძიება იმართება ქ. თბილისის მერიის პატრონაჟით.
კომპანია „თეგეტა მოტორსი" სპორტული აქციის ყველა მონაწილეს დააჯილდოვებს. სპეციალური პრიზები გადაეცემა გამარჯვებულ გუნდს. სხვა კომპანიებთან ერთად ავტორალში მონაწილეობას მიიღებს „თეგეტა მოტორსის" გუნდიც.
ავტორალი ეტლით მოსარგებლე პირების მონაწილეობით ამიერკავკასიის რეგიონში პირველად იმართება, ავტორალში მონაწილეობს მიიღებენ: ნანიკო ხაზარაძე, დათო მესხიშვილი, ნიკა არაბიძე, გიორგი სუხიტაშვილი, ვასილ ფხაკაძე, გიორგი ყიფშიძე. პროფესიონალი ავტომბროლელები: ზურა ბეჟაშვილი, დათო ნებიერიძე, გოგა გელაშვილი, ოთარ თავართქილაძე, მევლუდ მელაძე.
შეზღუდული შესაძლებლობის მქონე პირთა სოციალური ინტეგრაციისთვის ერთ-ერთი ყველაზე ეფექტური გზა მათი სპორტულ-კულტურულ ღონისძიებებში ჩართულობაა, სწორედ ამიტომ კომპანია „თეგეტა მოტორსი" მხარს უჭერს მსგავსი ტიპის აქციებს.
