დღეს, 18 მაისს presage.tv-ს (for.ge) მედიაკლუბში, 14 საათზე „ქართული ოცნებისთვის" შემოწირულობის გამო კონტროლის პალატის მიერ დაჯარიმებული მარიამ მეტრეველი, ვახტანგ ედიშერაშვილი, ბესიკ მუმლაური და თამაშა ჩიტაია პრესკონფერენციას გამართავენ.
2012 წლის 12 მარტს, საქართველოს კონტროლის პალატის ფინანსური მონიტორინგის სამსახურმა მარიამ მეტრეველი, ვახტანგ ედიშერაშვილი და ბესიკ მუმლაური 100 000 ლარით, ხოლო თამაშა ჩიტაია 50 000 ლარით დააჯარიმა.
„ქ-ნი ნათია მოგელაძის მიერ მათი გამოკითხვის პროცესი დადგმულ სისხლის სამართლის პროცესს ჰგავდა და განსაკუთრებული ულმობლობით გამოირჩეოდა. სასამართლო ინსტანციებმა შესაშური სისწრაფით, 2012 წლის 6 აპრილს დაასრულეს საქმის განხილვა და ჯარიმების შესახებ გადაწყვეტილებები ძალაში შევიდა", - აცხადებენ დაჯარიმებულები.
დაჯარიმებულმა პირებმა მოცემული უკანონო ჯარიმები ნებაყოფლობით არ გადაიხადეს, რის გამოც, რამდენიმე დღის წინ, ხელისუფლებამ გადაწყვეტილებების იძულებითი აღსრულების პროცესი დაიწყო.
მარიამ მეტრეველი, ვახტანგ ედიშერაშვილი, ბესიკ მუმლაური და თამაშა ჩიტაია აცხადებენ, რომ ხელისუფლების უკანონო თამაშში ჩაბმას და საკუთარი ბინების დატოვებას არ აპირებენ და ხელისუფლებას იწვევენ, თავად გადაწყვიტოს, სადამდე მივა მისი თავხედური ძალადობა საკუთარი მოსახლეობის წინააღმდეგ.
თავად დაჯარიმებულები კი აცხადებენ, რომ, როგორც კი ისევ გაუჩნდებათ შესაბამისი თანხები, კვლავ განახორციელებენ მსგავს შემოწირულობას, რათა თავიანთი წვლილი შეიტანონ „ქართული ოცნების" ახდენაში.
