დღეს, 18 მაისს, 11:00 საათზე, შოთა რუსთაველის ბათუმის სახელმწიფო უნივერსიტეტში ლექსიკოგრაფიაში მეორე საერთაშორისო სიმპოზიუმი გაიხსნება.
სიმპოზიუმზე საჯარო ლექციებს ცნობილი ქართველი და უცხოელი ლექსიკოგრაფები წაიკითხავენ. სიმპოზიუმის მუშაობაში ჩართული არიან საქართველოს თითქმის ყველა უნივერსიტეტისა და სამეცნიერო ცენტრის წარმომადგენლები, ცნობილი მეცნიერები, ლექსიკოგრაფები. სიმპოზიუმში მონაწილეობის მისაღებად ბათუმში ჩამოდიან ცნობილი ლექსიკოგრაფები იტალიიდან, გერმანიიდან, ჰოლანდიიდან, ისრაელიდან, შვედეთიდან, პორტუგალიიდან, ლატვიიდან, ლიტვიდან, რუსეთიდან, უკრაინიდან.
სიმპოზიუმის ორგანიზატორები არიან ივანე ჯავახიშვილის სახელობის თბილისის სახელმწიფო უნივერსიტეტის ლექსიკოგრაფიული ცენტრი; შოთა რუსთაველის ეროვნული სამეცნიერო ფონდი ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტი; თსუ არნოლდ ჩიქობავას სახელობის ენათმეცნიერების ინსტიტუტი.
სიმპოზიუმის ფარგლებში გაიმართება დისკუსია თემაზე: ელექტრონული კორპუსები და მათი გამოყენების პერსპექტივები ქართულ ლექსიკოგრაფიაში.
სიმპოზიუმის მუშაობა სამ დღეს გასტანს და 20 მაისს დასრულდება.
