21 მაისს, დავით გარეჯში მასშტაბური მსვლელობა მოეწყობა. როგორც კახეთის საინფორმაციო ცენტრს დავით გარეჯის სამონასტრო კომპლექსის წინამძღვარმა მამა ილარიონმა განუცხადა, მსვლელობა 12:00 საათზე დაიწყება და მასში სასულიერო პირები საქართველოს ყველა კუთხიდან მიიღებენ მონაწილეობას.
„სასულიერო პირების გარდა იქნებიან საზოგადოების წარმომადგენლებიც. ჩვენ ავალთ უდაბნოს მონასტერში და იქ პარაკლისს გადავიხდით. მესაზღვრეები ხალხს სადამდეც გამოუშვებენ, ისინი იქამდე ამოვლენ", - აღნიშნა მამა ილარიონმა.
შეგახსენებთ, რომ უდაბნოს მონასტერში ქართველი და აზერბაიჯანელი მესაზღვრეები ტურისტებს და მომლოცველებს 6 მაისის შემდეგ აღარ უშვებენ. აზერბაიჯანელი მესაზღვრეების განცხადებით, შესაბამისი ბრძანება მათ ზემოდან აქვთ მიღებული. 14 მაისს, საქართველოს საგარეო საქმეთა მინისტრის მოადგილემ ნინო კალანდაძემ განაცხადა, რომ გარეჯის სამონასტრო კომპლექსის ნაწილი, საბჭოთა კავშირის დროიდან მოყოლებული არ იმყოფებოდა საქართველოს საზღვრებში, რაც საზოგადოების ნაწილმა და საპატრიარქომ გააპროტესტეს.