"ხელისუფლებამ ცივი წყალი გადაგვასხა", - აცხადებს დეკანოზი მიქაელ ბოტკოველი დავით გარეჯის სამონასტრო კომპლექსის ირგვლივ შექმნილი სიტუაციის კომენტირებისას.
მისი თქმით, "გამოდის ისე, რომ ხელისუფლება დავით გარეჯთან დაკავშირებით ნაჩქარევ გადაწყვეტილებას აკეთებს", _ განცხადება ამის შესახებ ჟურნალისტებთან საუბრისას თბილისის საერთაშორისო აეროპორტში საქართველოს კათალიკოს პატრიარქის მდივანმა დეკანოზმა მიქაელ ბოტკოველმა გააკეთა.
"ჩვენ დიდი იმედი გვქონდა გუშინდლამდე, რომ ხელისუფლება აწარმოებდა მოლაპარაკებებს და ეს ჩვენი ქვეყნისთვის მართლაც უმნიშვნელოვანესი ძეგლები მოლაპარაკების გზით საქართველოს შემადგენლობაში აღმოჩნდებოდა. სამწუხაროდ, ვიგებთ გუშინ საღამოს, რომ ეს ტერიტორიები არ ყოფილა საქართველოს შემადგენლობაში და ისეთი მნიშვნელოვანი კულტურული ძეგლები, როგორიც არის ბერთუბანი, ჩოჩხიტური და მისი მიმდებარე ეკლესიები, აღმოჩნდა, ფაქტობრივად, საზღვარს იქით, სადაც დღეს ქართული იურისდიქცია არ ხორციელდება. ეს ძალიან სამწუხაროა ჩვენთვის, პირდაპირ წარმოუდგენელია - მოხდა ხელის გაშვერა კომუნისტებისკენ, კომუნისტური მმართველობის პერიოდისკენ, თითქოს მაშინ გადაეცა აზერბაიჯანს. ნამდვილად ვერ გავიზიარებთ ამ პოზიციას, რადგან იმ დროს როდესაც ხელისუფლებაში კომინისტები იყვნენ, ქართული მხარე იქ სამშენებლო სამუშაოს აწარმოებდა", _ ნათქვამია საპატრიარქოს განცხადებაში.
