"ქართული დასის" ლიდერმა ჯონდი ბაღათურიამ პარლამენტის რიგგარეშე სხდომაზე პრეზიდენტ მიხეილ სააკაშვილის "მილანში გართობა" გააპროტესტა.
როგორც ბაღათურიამ პარლამენტის დღევანდელ სხდომაზე განაცხადა, პრეზიდენტი მილანში გასართობად მაშინ წავიდა, როცა აზერბაიჯანელმა მესაზღვრებმა დავით გარეჯის ერთი ნაწილი უკანონოდ მიითვისეს, ხოლო თბილისში, 12 მაისს, სტიქიის შედეგად, 5 ადამიანი დაიღუპა.
"პარლამენტმა დღეს წუთიერი დუმილით პატივი მიაგო 5 ადამიანის ხსოვნას. პრეზიდენტი კი, რომელსაც ევალებოდა პატივი ეცა დაღუპულთა ხსოვნისთვის, იმ დღესვე წავიდა და ყველამ ნახა, რა მდგომარეობაში იმყოფებოდა ფეხბურთის ყურების დროს. ასევე სამარცხვინო ფოტომასალაა გამოქვეყნებული, როდესაც პრეზიდენტი მილანის ქუჩებში დასეირნობს და იქ ერთობა, ხან დისკოთეკებს ესწრება და ხან კონცერტებს", - აღნიშნა ბაღათურიამ.
შეგახსენებთ, გაზეთ "ალიას" დღევანდელ ნომერში გამოქვეყნებულია სააკაშვილის ფოტოები, რომელიც თბილიში მომხდარი ტრაგედიის შემდეგ მილანში პრეზიდენტის "შოპინგს" ასახავს.
