საქართველოს ეროვნული ნაკრების ყოფილმა კაპიტანმა კახა კალაძემ, ორიოდე დღის წინ ფეხბურთელის კარიერის დასრულების თაობაზე გააკეთა განცხადება. მან ბოლო ოფიციალური მატჩი, კვირას, სერია A-ს ბოლო ტურში გამართა „ჯენოას" შემადგენლობაში.
34 წლის კახა კალაძე სამშობლოში ამ დღეებში ბრუნდება. თუ რას გააკეთებს სახელოვანი ქართველი ფეხბურთელი საქართველოში, მის მიერ facebook-ით გაკეთებული განცხადებიდან ჩანს: „გადავწყვიტე, ჩემი ქვეყნის, ჩემი ხალხის მომავალი კეთილდღეობისთვის ვიბრძოლო".
კახა კალაძემ ფეხბურთის თამაში მშობლიურ სამტრედიაში დაიწყო, პირველი პროფესიული კლუბი კი, რომლის ღირსებასაც ის იცავდა, თბილისის „დინამოა". ყველაზე ტიტულოვან ქართულ გუნდში, მან 1993-1998 წლებში 82 მატჩი (1 გოლი) ითამაშა და 5-ჯერ ჩემპიონის, 4-ჯერ თასის მფლობელის ტიტული მოიგო.
შემდეგ მოდის კარიერის უკრაინული ეტაპი, სადაც იმ ქვეყნის ყველაზე ტიტულოვან კიევის „დინამოში", 2001 წლამდე 71 მატჩი (6 გოლი) გამართა. კიეველებთან ერთად კალაძე 3-3-ჯერ დაეუფლა ჩემპიონისა და თასის მფლობელის ტიტულს.
თითქმის 10 წელი გაატარა კახა კალაძემ იტალიური და მსოფლიო ფეხბურთის გრანდ „მილანში" (სერია A-ს 194 მატჩში 12 გოლი), რომლის შემადგენლობაში ქართველი ფეხბურთელისთვის დღემდე მიუღწეველ შედეგი აჩვენა - ორჯერ (2003, 2007) დაეუფლა ევროპის ჩემპიონთა ლიგის თასს, ამდენივეჯერ (2003, 2007) ევროპის სუპერთასს, ერთხელ (2007) მოიგო მსოფლიოს საკლუბო ჩემპიონატი. იტალიის შიდა ასპარეზზე, კალაძე თითოჯერ გახდა ჩემპიონი (2003-2004), თასისა (2002-2003) და სუპერთასის (2004) მფლობელი.
კარიერის ბოლო 2 სეზონი, კახა კალაძემ სერია A-ს კიდევ ერთი თვალსაჩინო წარმომადგენლის, „ჯენოას" რიგებში (53 მატჩი, 1 გოლი) გაატარა.
მის საფეხბურთო კარიერაში განსაკუთრებული ადგილი ეკავა საქართველოს ეროვნულ ნაკრებში ასპარეზობას (1996-2011). „ჯვაროსანთა" რიგებში კალაძემ 83 მატჩი (1 გოლი) ითამაშა, რომელთაგან 50-ში (ყველაზე მეტი ქართველებს შორის) მან კაპიტნის სამკლავურით გაიყვანა გუნდი მინდორზე.