უკრაინაში, ქალაქ ქერჩში წმინდა ნინოს სახელობის ქართული მართლმადიდებლური ეკლესია გაიხსნა,რომელიც ქართული სათვისტომოს წარმომადგენლების შემოწირულობებით აშენდა. ტაძრის აშენება ჯერ კიდევ 7 წლის წინ პატრიარქის ქერჩში სტუმრობის დროს გადაწყდა.ეკლესია მეორე მსოფლიო ომის დროს ქერჩში დაღუპულ 80 ათას ქართველ ჯარისკაცთა სულის მოსახსენიებლად აშენდა. ტაძარი ბორჯომისა და ბაკურიანის მიტროპოლიტმა მეუფე სერაფიმემ აკურთხა, რომელიც საპატრიარქოს ოფიციალურ დელეგაციას ხემძღვანელობდა. ქართული დელეგაციის ვიზიტი, რომლის შემადგენლობაშიც „ქრისტიან-დემოკრატებიც" შედიოდნენ ქერჩში ერთი კვირის განმავლობაში გაგრძელდა, სადაც მეუფე სერაფიმემ ქართველ ჯარისკაცთა სულის მოსახსენიებელი არაერთი პანაშვიდი გადაიხადა. გიორგი ახვლედიანის განცხადებით ქერჩში ქართული ეკლესიის გახსნა ათობით ათასი დაღუპული ქართველი ჯარისკაცის სულის მოსახსენიებლად ძალიან მნიშვნელოვანია.
„ისინი იბრძოდნენ სწორედ ქერჩის თავისუფლებისათვის, მაგრამ ამით იბრძოდნენ საკუთარი ქვეყნის თავისუფლებისათვის და საერთო მტრის წინააღმდეგ. ამხელა რაოდენობის მსხვერპლი ქართველ ერს ერთად აღებული არსად სხვაგან არ გაუღია" აღნიშნა გიორგი ახვლედიანმა
„უმნიშვნელოვანესი დღე არის, დღე როდესაც გავხსენით ქართული ეკლესია მიუხედავად ყოველივე სიძნელეებისა და დაბრკოლებებისა,ღმერთმა მოგვცა ასეთი დიდი ნუგეში, რომ აქ საქართველოდან ასე შორს ღვთის წყალობით აშენდა წმინდა ნინოს სახელობის ტაძარი" განაცხადა ბორჯომსია და ბაკურიანის მიტროპოლიტმა მეუფე სერაფიმემ.
