ქართულ ბიზნესს შესაძლებლობა ეძლევა, ჩინეთში, 1-ელ სექტემბერს დაგეგმილ სინძიან-ჩინეთ-ევრაზიის საერთაშორისო გამოფენაში მიიღოს მონაწილეობა და ადგილზე პირისპირ შეხვედრები გამართოს ჩინელ ბიზნესმენებთან, რათა სამომავლოდ ორ ქვეყანას შორის ურთიერთობები კიდევ უფრო გაღრმავდეს.
სწორედ ამ გამოფენის პოპულარიზაციისთვის და ქართველ ბიზნესმენებთან ურთიერთობების გასაღმავებლად საქართველოს ჩინეთის სინძიან-იუგურეთის ავტონომიური რეგიონის წარმომადგენლები ესტუმრნენ. დღეს გამართულ გაცნობით ბიზნესფორუმს ბიზნესსექტორის 100-მდე წარმომადგენელი ესწრებოდა.
"დღევანდელი საინფორმაციო შეხვედრა ჩინეთ-ევრაზიის საერთაშორისო გამოფენას ეხება. საქართველოში ვიზიტისას გვინდა ვაცნობოთ ადგილობრივ ბიზნესმენებსა და კომპანიებს, რომ შესაძლებლობა ეძლევათ, ამ გამოფენაში მიიღონ მონაწილეობა, დაუკავშირდნენ და ურთიერთობები გააღრმაონ ჩინურ კომპანიებთან", - აღნიშნა ჩინეთის სინძიან-იუგურეთის ავტონომიური რეგიონის გენერალური მდივნის მოადგილემ სუ გუანბინიმ.
საქართველოს სავაჭრო-სამრეწველო პალატის პრეზიდენტის კახა ბაინდურაშვილის განმარტებით, ქართული პროდუქციისათვის ჩინური ბაზარი მნიშვნელოვანია და ყველაფერი უნდა გაკეთდეს იმისათვის, რომ ჩინურ ბაზარზე რაც შეიძლება მეტი რაოდენობის ქართული პროდუქცია იყოს წარმოდგენილი.
"ამ დროისათვის საქართველოში ვიზიტად ჩინეთის ერთ-ერთი დელეგაცია იმყოფება. პრინციპში, სინძიან-იუგურეთი საქართველოსთვის ძალიან ცნობილი მხარეა, მისი დედაქალაქია ურუმჩი. ცოტა ხნის წინ თბილისსა და ურუმჩს შორის პირდაპირი ავიარეისების განხორციელებაც დაიწყო, რაც ბიზნესურთიერთობების გაღრმავებას შეუწყობს ხელს. ეს არის პროვინცია, საიდანაც საქართველოში ყველაზე მსხვილი ინვესტორები არიან წარმოდგენილნი. საუბარია ხე-ტყის ყველაზე მსხვილ ექსპორტიორ კომპანიაზე, რომელიც 150-მლნ.დოლარიან პროექტს ახორციელებს თბილისის ზღვასთან სავაჭრო და ლოჯისტიკური ცენტრის მშენებლობაზე. ჩინეთიდან ბიზნესმენები ჩამოსულნი არიან იმისათვის, რომ საქართველოს ბიზნესგარემოს კარგად გაეცნონ: თუ როგორ შეიძლება ურთიერთობების გაღრმავება მხარებს შორის. ჩვენთვის ჩინეთის ბაზარი მნიშვნელოვანია სავაჭრო კუთხითაც. ჩინეთის ბაზარი ჩვენთვის ყველაზე უფრო პერსპექტიული ბაზარია და კარგია, რომ ქართული ღვინო ჩინეთის ბაზარზე უკვე წარმოდგენილია. ამ პროვინციაშიც ქართული ღვინოზე ინფორმაცია აქვთ და სწორედ ამ მიმართულებითა სამუშაო, რომ ის ქართული ღვინო უფრო ფართოდ შევიდეს. ჩინეთის ცალკეული პროვინციები მნიშვნელოვანია ჩვენთვის ტურისტული კუთხითაც. გასულ წელს საქართველოში ჩინელი ტურისტები შემოვიდნენ, წელსაც შემოვლენ და ქვეყნებს შორის ფრენების გაზრდა განსაკუთრებით ამ პროვინციის ხარჯზე შეიძლება", - აღნიშნა ბაინდურაშვილმა.
საქართველოში ჩინეთის საგანგებო და სრუფლებიანი ელჩის, ჩენ ჯიანფუს თქმით, საქართველოსა და ჩინეთს შორის სავაჭრო-ეკონომიკური ურთიერთობები უნდა გაიზარდოს, რაც, ძირითადად, ორმხრივი შეხვედრებით მიიღწევა. სწორედ ამ მიზნით სტუმრობს საქართველოს ჩინეთის დელეგაცია - რათა ქართული ბიზნესი სინძიანის მხარით დააინტერესოს.
"ჩინეთიდან სამთავრობო დელეგაცია ჩამოვიდა იმისთვის, რომ კიდევ ერთხელ დადასტურდეს ჩინეთ-საქართველოს შორის სავაჭრო ეკონომიკური ურთიერთობების მნიშვნელობა და ამ გამოფენის მეშვეობით გაიზარდოს საქართველოს დაინტერესება ჩინეთის სინძიანი მხარის გამოფენის მიმართ. რაც, თავის მხრივ, ხელს შეუწყობს ორი ქვეყნის ეკონომიკური ურთიერთობების გაღრმავებას", - აღნიშნა ჩენ ჯიანფუმ.
აღსანიშნავია, რომ ბოლო წლების განმავლობაში საქართველოსა და ჩინეთს შორის სავაჭრო-ეკონომიკური ურთიერთობები გააქტიურდა. აღნიშნული ბიზნესფორუმი კი კიდევ ერთი საშუალებაა, იმისთვის რომ ქართულმა კერძო სექტორმა უკეთ გაიცნოს ჩინეთის საინვესტიციო და სავაჭრო გარემო, დაამყაროს საქმიანი კონტაქტები და მოიძიოს ახალი ბიზნესპარტნიორები.
საქართველოს სავაჭრო-სამრეწველო პალატის თანაორგანიზებით წლის დასაწყისიდან საქართველოსა და საზღვარგარეთ არაერთი მნიშვნელოვანი შეხვედრა და ბიზნესფორუმი გაიმართა, რომელთა მთავარი მიზანი ქვეყანაში ახალი ინვესტიციების მოზიდავა, ეკონომიკური განვითარების ხელშეწყობა, ბიზნესის სტიმულირება და ახალი სამუშაო ადგილების შექმნაა.