სოფლის მეურნეობის მინისტრი ზაზა გოროზია სამუშაო ვიზიტით ბრაზილიაში იმყოფებოდა. ბრაზილიელ კოლეგასთან მენდეს რიბეირო ფილიოსთან ორმხრივ შეხვედრაზე მხარეებმა სოფლის მეურნეობის დარგში ურთიერთთანამშრომლობისა და გამოცდილების გაზიარების საკითხებზე ისაუბრეს.
„საქართველოში სოფლის მეურნეობის განვითარებითვის უმნიშვნელოვანესია იმ ქვეყნების გამოცდილების გაზიარება, რომლებიც აღნიშნულ სფეროში განსაკუთრებით წარმატებულები არიან. ბრაზილიის ფედერაციული რესპუბლიკა მართლაც სამაგალითოა, რადგან მთლიანად იმპორტზე დამოკიდებული ქვეყანა, დროის ხანმოკლე პერიოდის განმავლობაში სასოფლო-სამეურნეო პროდუქციის უმსხვილესი ექსპორტიორი გახდა. გამართულ შეხვედრებს თანამშრომლობის განვითარების კუთხით პრაქტიკული გაგრძელება მოყვება და უახლოეს მომავალში საქართველოს ბრაზილიის სოფლის მეურნეობის მინისტრის ხელმძღვანელობით ოფიციალური დელეგაცია ეწვევა",- აღნიშნა ზაზა გოროზიამ.
გასულ წელს, საქართველოსა და ბრაზილიას შორის თანამშრომლობის მემორანდუმი გაფორმდა, რომელიც ქვეყნებს შორის ეკონომიკურ, ტექნოლოგიურ და სამეცნიერო სფეროებში ურთიერთთანამშრომლობას ითვალისწინებს. მემორანდუმის ფარგლებში, 17-21 აპრილს, საქართველოს ბრაზილიის სოფლის მეურნეობის ექსპერტებისგან შემდგარი ჯგუფი ეწვია. ექსპერტებმა თანამედროვე ტექნოლოგიებით აღჭურვილი სასათბურე მეურნეობები, მეცხოველეობის ფერმები, ციტრუსის პლანტაციები და სადემონსტრაციო ნაკვეთები მოინახულეს. ისინი ქართული ღვინისა და ყველის დამზადების ტრადიციულ ტექნოლოგიებსაც გაეცნენ.
