გუშინ, დილით, ზაქათალას რაიონში მომხდარი ძლიერი მიწისძვრის შედეგად რაიონის ტერიტორიაზე 300-ზე მეტი საცხოვრებელი სახლი დაზიანდა, 40 სახლი კი ჩამოინგრა. როგორც კახეთის საინფორმაციო ცენტრის კორესპონდენტი იტყობინება ჰერეთიდან, ზაქათალის რაიონის საგანგებო სიტუაციათა კომისიის თავმჯდომარემ ელმან რამაზანოვმა განაცხადა, რომ რამდენიმე ადამიანი ნანგრევებში მოჰყვა, ათზე მეტი კი დაშავდა. მსხვერპლის შესახებ ინფორმაცია არ ვრცელდება.
მიწისძვრის შედეგად დაზიანებული ობიექტების გამოსავლენად და დაზარალებულებისთვის შესაბამისი დახმარების გაწევის მიზნით, საგანგებო კომისია გუშინ დილიდან მუშაობს. რამაზანოვმა ჟურნალისტებთან საუბარში დაადასტურა, რომ მიწისძვრის შედეგად 300-ზე მეტი სახლი დაზიანდა, ხოლო 40 ჩამოინგრა.
შეგახსენებთ, რომ აზერბაიჯანში,ზაქათალას რაიონში ძლიერი მიწისძვრა გუშინ დილით მოხდა. მიწისძვრა 08:40 საათზე დაფიქსირდა და მიწისქვეშა ბიძგების სიმძლავრე რიხტერის შკალით 5.7 მაგნიტუდას შეადგენდა. მიწისძვრის შედეგად კახის რაიონში სოფლების ალათემურის და მეშაბაშის ქართული სკოლის შენობებიც დაზიანდა. მიწისქვეშა ბიძგები დაფიქსირდა საქართველოშიც, განსაკუთრებით კი კახეთში. დედოფლისწყაროს, სიღნაღის და ლაგოდეხის რაიონები ზაქათალას რაიონიდან, სადაც მიწისძვრის ეპიცენტრია, 30-40 კილომეტრით არის დაშორებული. სიღნაღის რაიონის სოფელ ყარაღაჯში საერთო საცხოვრებელი დაზიანდა.
