საქართველოს სოფლის მეურნეობის მინისტრის მოადგილე კონსტანტინე კობახიძე და აჭარის სოფლის მეურნეობის მინისტრი დონარა სურმანიძე ხელვაჩაურიოს რაიონში, სოფელ ჭარნალში იმყოფებოდნენ და დავითაძეების ოჯახს ბოსტნეულის ჩითილები გადასცეს.
ბოსტნეულის ჩითილებს შპს "საქართველოს სათბურების კომპანია'' აწარმოებს. კომპანიის საქმიანობა რეგიონის ფერმერულ მეურნეობებში ბოსტნეულის წარმოების მოცულობის გაზრდას მნიშვნელოვნად უწყობს ხელს.
ხელვაჩაურის რაიონის სოფელ ახალსოფელში მდებარე 5000 კვ.მ ფართობის საჩითილე სათბურში 4 ჯიშის ბოსტნეულის (კიტრი, პომიდორი, ტკბილი წიწაკა, ბადრიჯანი) 7 სხვადასხვა სახეობის ჩითილის გამოყვანა ხდება.
დღეის მდგომარეობით, საჩითილე მეურნეობაში გამოყვანილია კიტრის, პომიდვრის, ბადრიჯნის, ტკბილი წიწაკის - 2 700 000 ცალი ჩითილი. სამომავლოდ საჩითილეს წარმადობის გაზრდა დაახლოებით 4 მილიონამდე იგეგმება.
