საქართველოს ეკონომიკისა და მდგრადი განვითარების მინისტრმა თურქულ მხარესთან თურქული გემების ოკუპირებული აფხაზეთის აკვატორიაში შესვლის საკითხი დააყენა. თურქულ მხარეს აღნიშნულის შესახებ ვერა ქობალიამ ლაიფციგში, საერთაშორისო სატრანსპორტო ფორუმის ფარგლებში ისაუბრა. შეხვედრაზე თურქეთის მინისტრმა კიდევ ერთხელ დაადასტურა საქართველოს სუვერენიტეტი და ტერიტორიული მთლიანობა.
თურქეთის, ჩინეთისა და კორეის ტრანსპორტის უწყებების ხელმძღვანელებთან შეხვედრაზე ქობალიამ ყურადღება ასევე გაამახვილა საქართველოს გავლით ევროპა-აზიის სატრანსპორტო სავაჭრო დერეფნის განვითარების საკითხზე და კოლეგებს რეგიონული მნიშვნელობის შეთანხმებებისა და საერთო გადაწყვეტილებების მიღებისკენ მოუწოდა. ამ ინიციატივების ამოქმედების შემდეგ შეიქმნება საქართველოში ლოგისტიკური ცენტრების ბიზნესის მეტად განვითარების რეალური აუცილებლობა, რაც საქართველოს რეგიონული მნიშვნელობის ჰაბად აქცევს.