დღეს, იუსტიციის სამინისტროს საჯარო რეესტრის ეროვნული სააგენტოს და საქართველოს ტექნიკური უნივერსიტეტის საინჟინრო-გეოდეზიის დეპარტამენტის წარმომადგენლები სასწავლო ვიზიტით შვედეთში გაემგზავრნენ.
ვიზიტის მიზანია გეოდეზიის სფეროში სასწავლო პროგრამების, თანამედროვე მეთოდების გაცნობა და ამ სფეროში შვედეთის გამოცდილების გაზიარება. ვიზიტის ფარგლებში ქართული დელეგაცია შეხვდება შვედეთის მიწის კადასტრის, რეგისტრაციისა და ელექტრონული რუკების წარმოების ეროვნულ სააგენტოს. მათი ექსპერტების დახმარებით საჯარო რეესტრის ეროვნულმა სააგენტომ გასულ წელს დაასრულა მუშაობა საქართველოში მუდმივმოქმედი საბაზისო სადგურების და ეროვნული გეოდეზიური ქსელის (GEO-CORS) შექმნის პროექტზე.
ვიზიტის ფარგლებში ასევე დაგეგმილია შეხვედრები სტოკჰოლმის თანამედროვე ტექნოლოგიების სამეფო უნივერსიტეტში, გეოდეზიისა და ტექნოლოგიების უმაღლეს სკოლაში, ქ. ლუნდისა და იავლეს ტექნიკურ უნივერსიტეტებში.
ვიზიტი, შვედეთის საერთაშორისო განვითარების სააგენტოს (Sida) „საჯარო რეესტრის ეროვნული სააგენტოს (NAPR) ორგანიზაციული განვითარება და გაუმჯობესებული მომსახურების" პროექტის მხარდაჭერით ხორციელდება.
ვიზიტი 11 მაისს დასრულდება.
მასალის გამოყენების პირობები
