კუნძულ უტოიაზე ანდერს ბრეივიკის მიერ მოკლული თამთა ლიპარტელიანის მამა, ავთანდილ ლიპარტელიანი ნორვეგიაში ტერორისტის სასამართლო პროცესზე ხვალ, 8 მაისს, გაემგზავრება.
მას სასამართლო პროცესზე დაკითხავენ, სადაც კონკრეტული საკითხების დასმას აპირებს. ლიპარტელიანის მამას ბრეივიკის გასამართლება საერთაშორისო კანონმდებლობით სურს და მისთვის სამუდამო პატიმრობის მისჯას მოითხოვს.
კუნძულ უტოიაზე 77 ადამიანის მკვლელობაში ბრალდებულის, ანდერს ბრეივიკის სასამართლო პროცესი 10 მაისს გაგრძელდება.
22 ივლისს ნორვეგიაში, ოსლოსა და კუნძულ უტოიაზე ბრეივიკის მიერ განხორციელებული ორივე ტერაქტის შედეგად 77 ადამიანი დაიღუპა. მათ შორის იყო ქართველი თამთა ლიპარტელიანიც. კიდევ ერთი ქართველი სტუდენტი, ნათია ჩხეტიანი კი ბრეივიკის ტყვიას გადაურჩა.
