სოფლის მეურნეობის მინისტრი ზაზა გოროზია აჭარის რეგიონს ეწვია და ქობულეთის რაიონის სოფელ ცეცხლაურში 6 ჰექტარზე გაშენებული მოცვის სადემონსტრაციო პლანტაცია დაათვალიერა.
როგორც "ჯი-ეიჩ-ენს" საქართველოს სოფლის მეურნეობის სამინისტროდან აცნობეს, მოცვის წარმოების ხელშეწყობის პროგრამა წარმოადგენს პილოტურ პროექტს, რომლის განხორციელება სოფლის მეურნეობის სამინისტროს ინიციატივით სოფლის მეურნეობის კორპორაციამ 2010 წელს დაიწყო. პროგრამა მიზნად ისახავს, საქართველოში განავითაროს მოცვის, როგორც ახალი პროდუქტის პირველადი წარმოება. მიღებული გადაწყვეტილების თანახმად მოცვის კულტურის გაშენება შავი ზღვის სამ რეგიონში: აჭარაში, გურიასა და სამეგრელოში მოხდა. აღნიშნული ტერიტორიები გამოირჩევა ნიადაგის მაღალი მჟავიანობით, რაც მოცვის გაშენებისთვის ერთ-ერთი აუცილებელი პირობაა. შავი ზღვის კლიმატი კი იძლევა იმის საშუალებას, რომ ჩვენ შეგვიძლია ერთი თვით ადრე მივიღოთ მოსავალი და ამით გარანტირებული გასაღების ბაზარი შევქმნათ მრავალი წლის განმავლობაში, რითაც ადგილობრივ მოსახლეობას კიდევ ერთი დამატებითი შემოსავალის მიღების საშუალება ექნებათ.
ქართული მოცვი უკვე გადის უკრაინასა და აზერბაიჯანში. ამ ეტაპზე ქართველი მეწარმეები სხვა უცხოური ბაზრების ასათვისებლადაც ემზადებიან. წინასწარი გათვლებით საქართველოში მოყვანილი კენკრა ბაზარზე კიდევ უფრო მეტად მოთხოვნადი იქნება და მისი ფასი 3-4 ევრო ეღირება.
დღესვე, ზაზა გოროზია სოფელ ნატანებში, 5 ჰექტარზე სასიმინდე ფართობში, მიმდინარე საგაზაფხულო სასოფლო-სამეურნეო სამუშაოების გაეცნო. ხვნა-თესვის პროცესი სოფლის მეურნეობის განვითარების და ფერმერთა დახმარების პროგრამით შემოყვანილი ტექნიკით მიმდინარეობს. სულ გურიის რეგიონში 11 ახალი ტრაქტორი მუშაობს. ახალი ტრაქტორებით მოსახლეობას უფრო მეტი მიწის დამუშავების შესაძლებლობა აქვს, რაც მოსავლის რაოდენობას და მიღებულ შემოსავალს გაზრდის.