ქუთაისში გარე განათების თანამედროვე სისტემის დანერგვის საპილოტე პროექტი განხორციელდა, რომელიც შეამცირებს ელექტროენერგიის მოხმარებას და გააუმჯობესებს ეკოლოგიურ მდგომარეობას.
ქუთაისის გარე განათების სისტემის მოდერნიზაციის საპილოტე პროექტი „ინტერრაო ეეს -ის ენერგოეფექტურობის ცენტრმა", საქართველოს ენერგოეფექტურობის კომპანიასთან და ქუთაისის მერიასთან ერთად განახორციელა.
საპილოტე პროექტის მიზანია ეკონომიკური ეფექტის პრაქტიკული დემონსტრირება, ენერგიის დაზოგვის და თანამედროვე ტექნოლოგიის შესაძლებლობების პოპულარიზაცია, პრაქტიკული საფუძველის შექმნა მსგავსი პროექტების განხორციელებისთვის. პროექტის პრეზენტაცია ქუთაისის მერიაში 25 აპრილს გაიმართა.
პროექტის ფარგლებში, აღმაშენებლის გამზირზე 30-მდე თანამედროვე დიოდური ნათურა დამონტაჟდა, რომლებიც ჩართულია სპეციალურად ამ პროექტისთვის შექმილ ენერგორესურსების აღრიცხვის ავტომატიზებულ სისტემაში (АСУЭ). სისტემა საშუალებას იძლევა რეალურ დროში მიღებულ იქნას მონაცემები ენერგიის მოხმარების შესახებ- როგორც კილოვატ საათებში, ასევე ფულად ექვივალენტში.
გათვლების მიხედვით, დიოდური განათების დამონტაჟების ხარჯების ამოგება 4 წელიწადში მოხდება. საპილოტე პროექტის მხოლოდ 30 დიოდური ნათურიდან მიღებული ეკონომია მათი ექსპლუატაციის პერიოდში 30 ათას ლარზე მეტს შეადგენს .
როგორც „ინტერრაო ეეს-ის ენერგოეფექტურობის ცენტრის" გენერალური დირექტორის მოადგილე კომერციულ დარგში თამარ მერებაშვილი აცხადებს, თანამედროვე დიოდური ნათურების გამოყენება საშუალებას იძლევა ელექტროენერგიის მოხმარება სამჯერ შეამციროს. ეკონომიურთან ერთად მიიღწევა დადებითი ეკოლოგიური ეფექტიც, რადგან ნაკლები ელექტროენერგიის მოხმარება მნიშვნელოვნად ამცირებს ნახშიროჟანგის გამოყოფას. გათვლების მიხედვით, ქუთაისის გარე განათების მთელი ქსელის მოდერნიზაცია CO2 გამოყოფას წელიწადში 1600 ტონით შეამცირებს (60 ათასი ხის ექვივალენტი).
იმ მონაკვეთებზე, სადაც დიოდური ნათურებია დამონტაჟებული, გზის საფარისა და მიმდებარე ტერიტორიების თანაბარი განათების შედეგად საგზაო მოძრაობის უსაფრთხოება გაცილებით იზრდება .
პრეზენტაციაზე აგრეთვე წარმოდგენილი იყო ქუთაისის გარე განათების ქსელის მოდერნიზების გეგმა. ქუთაისის მერმა გიორგი თევდორაძემ დადებითად შეაფასა საპილოტე პროექტის შედეგები და მისი შემდგომი განვითარებით დაინტერესდა.