6 თვის აფხაზი ბავშვი, რომელსაც ქართველი ექიმები მკურნალობდნენ, გამოჯანმრთელდა და უკვე ოკუპირებულ აფხაზეთში გადაიყვანს. ენგურის ხიდამდე იგი ქართველმა მედიკოსებმა მიაცილეს. გაწეული დახმარებისთვის საქართველოს პრეზიდენტსა და მთავრობას ჩვილის მშობლები მადლობას ენგურის ხიდიდან უხდიდნენ.
ელარია ბაგათელია გულის მანკითა და სასუნთქი გზების თანდაყოლილი პათოლოგიით ჯო ენის კლინიკაში გასული წლის 6 ნოემბერს გადმოიყვანეს, როდესაც ის 8 დღის იყო. ქართველმა ექიმებმა მას გულის ურთულესი ოპერაცია ჩაუტარეს.
ბავშვის ჯანმრთელობის მდგომარეობა ამ დროისთვის სტაბილურია. რამდენიმე თვის განმავლობაში ჩვილი ქართველი მედიკოსების მეთვალყურეობის ქვეშ იმყოფებოდა.
ელარია ბაგათელია გულის მანკის დიაგნოზით გაგრის სამშობიარო სახლში დაიბადა. ჯანმრთელობის მდგომარეობის გაუარესების გამო, ბაგათელიას მშობლებმა დახმარების თხოვნით საქართველოს მთავრობას მიმართეს. ოპერაციისა და მკურნალობის ხარჯები მთლიანად ქართულმა მხარემ დაფარა.
