თბილისის მერიის ერთ-ერთი მთავარი პრიორიტეტი ქალაქში სტაბილური ბიზნეს-გარემოს შექმნა და ინვესტიციების მოზიდვაა, რაც ახალი სამუშაო ადგილების შექმნას უწყობს ხელს. თბილისის მერი გიგი უგულავა დღეს ჩეხეთის რესპუბლიკის დელეგაციას შეხვდა, რომელსაც ჩეხეთის პარლამენტის სენატის თავმჯდომარე მილან სტეჩი ხელმძღვანელობს. მათი ვიზიტის მიზანი საქართველოში ბიზნეს-პარტნიორების მოძიება და საქმიანი ურთიერთანამშრომლობის დამყარებაა.
თბილისში ოფიციალური ვიზიტით მყოფი ჩეხეთის დელეგაციის შემადგენლობაში სხვადასხვა სფეროს: სოფლის მეურნეობის, დისტრიბუციის, სამრეწველო, სამშენებლო, ენერგეტიკის, საკონსულტაციო და საფინანსო სექტორის 20-მდე კომპანიის წარმომადგენლები შედიან.
შეხვედრაზე გიგი უგულავამ ჩეხეთის დელეგაციის წარმომადგენლებს თბილისში არსებული ბიზნეს-გარემო და ქალაქში მიმდინარე მნიშვნელოვანი ინფრასტრუქტურული პროექტები გააცნო. ორ ქვეყანას შორის ურთიერთთანამშრომლობის გაღრმავება თბილისში ახალი ინვესტიციების მოზიდვასა და სამუშაო ადგილების შემნასა შეუწყობს ხელს. ამ მიმართულებით თბილისის მერია მჭიდროდ თანამშრომლობს სხვადასხვა ქვეყნის ხელისუფლებასთან და ბიზნეს სექტორთან.
