საქართველოს პრეზიდენტმა ქობულეთში თანამედროვე სტანდარტების პროფესიული კოლეჯი "ახალი ტალღა" გახსნა. მიხეილ სააკაშვილი კოლეჯის მესვეურებსა და სტუდენტებს შეხვდა და მათ პროფტექნიკური სასწავლებლების მნიშვნელობაზე ესაუბრა.
ქვეყნის პირველი პირი მოსახლეობის დასაქმების საკითხს შეეხო, რაც, მისი თქმით, პირდაპირ კავშირშია ქვეყნის ეკონომიკის, ტურიზმის, ენერგეტიკის სფეროების განვითარებასთან. სააკაშვილის განცხადებით, ხალხის დასაქმების გარდა, ტურიზმი საქართველოსთვის არის გეოპოლიტიკა, უსაფრთხოება და ქვეყნის განვითარების გარანტია. ამიტომ, როგორც პრეზიდენტმა აღნიშნა, აუცილებელია კვალიფიციური კადრების მომზადება, რაშიც გადამწყვეტი მნიშვნელობა მსგავს სასწავლებლებს ენიჭება.
ახალ კოლეჯში ფუნქციონირებს რამდენიმე ლაბორატორია და სახელოსნო, რომლებიც აღჭურვილია უახლესი აპარატურით, ყველა საჭირო ინვენტარითა და თანამედროვე მატერიალურ-ტექნიკური ბაზით. სტუდენტებისთვის აშენდა სასტუმროს ტიპის საერთო საცხოვრებელიც. ამჟამად კოლეჯში 500-ზე მეტი სტუდენტია დარეგისტრირებული. რეგისტრაციისა და 1000-ლარიანი ვაუჩერების გაცემის პროცესი კვლავაც მიმდინარეობს.
სააკაშვილთან ერთად ახლად გახსნილ კოლეჯში განათლებისა და მეცნიერების მინისტრი დიმიტრი შაშკინიc იმყოფებოდა.